ލެބޯޓަރީއާއެކު މަރޮށީގެ ޞިއްޙީ މަރުކަޒުގެ ޚިދުމަތް 24 ގަޑިއިރަށް

ށ. މަރޮށީގައި ލެބޯޓަރީގެ ޚިދުމަތް ފަށައިފިއެވެ. މަރޮށީގައި މި ޚިދުމަތް ފައްޓަވައިދެއްވީ، ޞިއްޙަތާއި ޢާއިލާއާއި އިޖްތިމާޢީ އެހީއާ ބެހޭ ވަޒީރު ޤީލާ ޢަލީއެވެ.

މަރޮށީ ޞިއްޙީ މަރުކަޒުގައި ލެބޯޓަރީގެ ޚިދުމަތް ފެށުމަށް މިއަދު އެރަށުގައިވަނީ، ޚާއްސަ ރަސްމިއްޔާތެއް ބާއްވާފައެވެ. މި ރަސްމިއްޔާތުގައި ޞިއްޙީ ވަޒީރު ޤީލާ ޢަލީގެ އިތުރުން ސިއްޙީ ވުޒާރާގެ އިސްވެރިންނާއި، މަރޮށީގެ ކައުންސިލްގެ އިސްވެރިންނާއި، ސިއްޙީ މަރުކަޒުގެ އިސްވެރިން ބައިވެރިވެ ވަޑައިގެންނެވިއެވެ.

މި ރަސްމިއްޔާތުގައި ވާހަކަދައްކަވަމުން ވަޒީރު ޤީލާ ޢަލީ ވިދާޅުވީ އައު ލެބޯޓަރީއާއެކު ޞިއްޙީ ޚިދުމަތް 24 ގަޑިއިރަށް ބަދަލުވުމަކީ އެރަށަށް ލިބުނު ބޮޑު ކުރިއެރުމެއްކަމަށެެވެ.
ލެބޯޓަރީ ޚިދުމަތް ފެށިގެން ދިޔުމުން ޓެސްޓުތައް ހެދުމަށް އެހެން ރަށްރަށަށް ދަތުރުކުރަން ޖެހުން ނިމުމަކަށް އަންނާނެކަން ވަޒީރު ފާހަގަކުރެއްވިއެވެ.

މަރޮށީގައި މީގެ ކުރިން ޞިއްޙީ މަރުކަޒުގެ ޚިދުމަތް ދެމުންއައީ 16 ގަޑިއިރަށެވެ. އެހެންނަމަވެސް ހުޅުވިގެންދިޔަ އައު ލެބޯޓަރީއާއެކު އެރަށުގެ ޞިއްޙީ މަރުކަޒުގެ ޚިދުމަތް ވަނީ 24 ގަޑިއިރަށް ބަދަލުކޮށްފައެވެ.

ލެބޯޓަރީއެއް ނެތް ގިނަ ރަށްތަކުން ޓެސްޓު ހެދުމަށް އެހެން ރަށްރަށަށް ދާފަދައިން މަރޮށީ ރައްޔިތުންވެސް ދާންޖެހެނީ، އެ ޚިދުމަތް ލިބޭ އަތޮޅުގެ ކޮންމެވެސް ރަށަކަށެވެ. ރަށުގައި ތިބެގެން ލޭ އެޅުމުގެ ޚިދުމަތާއި، އާއްމު ބައެއް ޓެސްޓްތައް ހެދުމުގެ ފުރުޞަތު ލިބުމާއެކު ރަށުގެ ރައްޔިތުންގެ ޖީބަށް ލުއިވެ ހައްޓަށްވެސް ފަސޭހަވާނެކަން އެރަށުގެ ރައްޔިތުން ޤަބޫލުކުރެއެވެ.

މީގެ އިތުރުން، އޭގެ ސަބަބުން ހަކުރު ބައްޔާއި، ހިތުގެ ބައްޔާއި، ލޭ މައްޗަށް ދިއުމާއި، ކިޑްނީ މައްސަލަތައް ފަދަ ޢާންމުކޮށް ފާހަގަކުރެވޭ ބޮޑެތި ބަލިތައް ދެނެގަތުމަށް ފަސޭހަވެ، ދުރާލައި ބަލިތައް ދެނެގަތުމަށް މަގުފަހިވާނެ ކަމަށް ޞިއްޙީ ވުޒާރާއިން ވިދާޅުވެއެވެ. އެ ވުޒާރާއިން ވިދާޅުވި ގޮތުގައި ރާއްޖޭގައި އާންމުކޮށް މަދިރީގެ ޒަރިއްޔާއިން ފެތުރޭ ޑެންގޫ ފަދަ ބަލިތަކާއި ގުޅުންހުރި ޓެސްޓުތަކާއި، މާބަނޑު މީހުން ޤަވާއިދުން ހަދަންޖެހޭ ޓެސްޓުތައް ހެދުމަށްވެސް މި ލެބޯޓަރީގެ ސަބަބުން މަގުފަހި ވެގެންދާނެއެވެ.

މާކުރަތު ޞިއްޙީ މަރުކަޒުގައި ލެބޯޓްރީގެ ޚިދުމަތް ރަސްމީކޮށް ފަށާފައިވާއިރު، ރާއްޖޭގެ ހުރިހާ ރަށެއްގައި ލެބޯޓަރީގެ ޚިދުމަތް ދިނުމަކީ ސަރުކާރުގެ އަމާޒެކެވެ. އަދި އެއީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ރިޔާސީ ވަޢުދެކެވެ. އެގޮތުން މިހާތަނަށް ލެބޯޓަރީ ޤާއިމުވެފައިވާ ނުވާ 76 ރަށުގައި ލެބޯޓަރީގެ ޙިދުމަތް ޤާއިމުކުރުމުގެ މަސައްކަތުގެ ދަށުން މަރޮށީގައި ހުޅުވިގެން ދިޔައީ 19 ވަނަ ލެބޯޓަރީއެވެ.