އިސްރަށްވެހިންގެ އުފާގައި އައިކެއާގެ ލޮލުގެ ސްކްރީނިން ޕްރޮގްރާމެއް

ވިލިމާލެ ޕޮލިހުން ބޭއްވި "އިސްރަށްވެހިންގެ އުފާ" ހަރަކާތުގައި އައިކެއާއިން އިސްރަށްވެހިންގެ ލޮލުގެ ސްކްރީނިން ޕްރޮގްރާމެއް ކުރިއަށް ގެންގޮސްފިއެވެ.

ބައިނަލްއަޤްވާމީ އުމުރުންދުވަސްވީ މީހުންގެ ދުވަސް ފާހަގަކުރުމުގެ ގޮތުން ހުކުރު ދުވަހު ވިލިމާލެ ޕޮލިހުން އިންތިޒާމު ކޮށްގެން ބޭއްވި "އިސްރަށްވެހިންގެ އުފާ" ހަރަކާތުގައި އައިކެއާ ހޮސްޕިޓަލުން ވަނީ ބައިވެރިވެފައެވެ. އުމުރުން ދުވަސްވީ މީހުންގެ އަގުވަޒަންކޮށް، އެމީހުންގެ ދުޅަހެޔޮކަން އިތުރުކުރުމަށް ޚާއްޞަކޮށްގެން ބޭއްވި މި ހަވީރުގައި، އައިކެއާގެ ޓީމުން ވަނީ ވިލިމާލޭގެ އިސްރަށްވެހިންނަށް ޚާއްސަކޮށް ލޮލުގެ ސްކްރީނިންގ ޕްރޮގްރާމެއް ކުރިއަށް ގެންގޮސްފައެވެ.

މި ހަރަކާތުގައި ވަނީ އުމުރުން ދުވަސްވީ މީހުން ޤަވާއިދުން ލޯ ޗެކްކުރުމުގެ މުހިންމުކަން ބުނެދީ މުހިންމު މަޢުލޫމާތުތައް ފޯރުކޮށްދީފައެވެ. ލޮލުގެ ފެނުން ދުޅަހެޔޮކަންމަތީ ދެމެހެއްޓުމަކީ ދުވަސްވީ މީހުން އަމިއްލައަށް އުޅުމަށާއި، ދުވަހުން ދުވަހަށް ކުރަންޖެހޭ ކަންކަން ފަސޭހަކަމާއެކު ކުރުމުގެ އިތުރުން އާއިލާއާއެކު އުފާވެރި ވަގުތުތައް ހޭދަކުރުމަށް އެހީތެރިވެދޭ ކަމެއްގެ ގޮތުގައި އައިކެއާއިން ފާހަގަކުރިއެވެ. އަދި އެފަރާތްތަކުގެ ލޮލުގެ ސިއްހަތަށް ސަމާލުކަން ދިނުމަކީ، ދިރިއުޅުމުގެ ފެންވަރު ރަނގަޅުކުރުމަށް ކޮންމެހެން މުހިންމު ކަމެއްގެ ގޮތުގައވެސް ފާހަގަކުރިއެވެެ.

އުމުރުން ދުވަސްވީ މީހުންނަށް ދިމާވާ ލޮލުގެ މައްސަލަތަކުގެ ތެރޭގައި ކެޓަރެކްޓް (ލޮލަށް ފުސްއެރުން)، ގްލައުކޯމާ (ލޮލުގެ ޕްރެޝަރު މަތިވުން) އަދި އުމުރާ ގުޅިގެން މެކިއުލާ ހަލާކުވުން (އޭއެމްޑީ) ފަދަ ލޮލުގެ ބަލިތަކަށް ހުށަހެޅުމުގެ ފުރުސަތު ބޮޑުވެއެވެ. ހަކުރުބަލި ހުންނަ ފަރާތްތަކުންވެސް ލޮލުގެ ސިއްހަތަށް ޚާއްޞަ ސަމާލުކަމެއް ދޭންޖެހެއެވެ. ލޮލުގެ ބައެއް ބަލިތަކަކީ އޭގެ ކުރީކޮޅުގައި އެއްވެސް އަލާމާތެއް ނުފެނި އަވަހަށް ބޮޑުވަރުވާ ބަލިތަކަކަށްވާތީ، ލޮލުގެ ފެނުމަށް ބަދަލެއް ނައި ނަމަވެސް، ޤަވާއިދުން ލޮލުގެ ފުރިހަމަ ޓެސްޓުތައް ހެދުމަށް ވަނީ އިރުޝާދު ދީފައެވެ. އަދި ލޮލުގެ ފެނުމަށް އަންނަ ބަދަލުތަކަކީ، ހަމައެކަނި މުސްކުޅިވުމުން ވާކަމެއް ކަމަށް ބަލައި ދޫކޮށްނުލައި، އަވަހަށް ޑޮކްޓަރަށް ދައްކާ ފަރުވާ ހޯދުމަށްވެސް އިރުޝާދު ދީފައިވެއެވެ.

މިފަދަ އިޖުތިމާޢީ ބައިވެރިވުންތަކުގެ ޒަރީއާއިން ލޮލުގެ ސިއްހަތާ މެދު ހޭލުންތެރިކަން އިތުރު ކުރުމަށާއި، ކޮންމެ އުމުރުފުރާއެއްގެ މީހަކަށްވެސް ދުޅަހެޔޮ ފެނުމެއް ހޯދައިދިނުމަށް އައިކެއާއިން އަބަދުވެސް މަސައްކަތްކުރާނެ ކަމަށް އެ ކުންފުނިން ބުނެއެވެ.