ޑްރަގް ޓްރެފިކްކުރި ކުރި މީހަކަށް އުމުރު ދުވަހުގެ ދެ ހުކުމް

ވެލާނާ އިންޓަރނޭޝަނަލް އެއަރޕޯޓުން ގއ. ކޫއްޑޫއަށް ފުރުމަށް ގޮސް ހުރި މީހެއްގެ އަތުން ޑްރަގް ފެނުނު މައްސަލައިގައި އޭނާގެ މައްޗަށް އުމުރު ދުވަހަށް ޖަލަށްލުމުގެ ދެ ހުކުމް ކްރިމިނަލް ކޯޓުން އިއްވައިފިއެވެ.

ކްރިމިނަލް ކޯޓުން މި ހުކުމްތައް ކޮށްފައިވަނީ ށ. ނޫމަރާ، ހަވީރީގެ ޢަބްދުﷲ ފަޞީހުގެ މައްޗަށް ދައުލަތުން އުފުލި ދެ ދައުވާއާ ގުޅިގެންނެވެ. ދައުލަތުން އޭނާގެ މައްޗަށް އުފުލާފައިވަނީ ކެނެބިސް ޓްރެފިކް ކުރުމުގެ ކުށުގެ ދައުވާއާއި ޑައިފޯމިން ޓްރެފިކް ކުރުމުގެ ކުށުގެ ދައުވާއެވެ.

ޢަބްދުﷲ ފަޞީހުގެ އަތުން ކެނެބިހާއި ޑައިފޯމިން ފެނިފައިވަނީ ވެލާނާ އިންޓަރނޭޝަނަލް އެއަރޕޯޓުން ކޫއްޑޫއަށް ފުރަން ގޮސް ޑިޕާޗާ ހޯލަށް ވަންނަން ސެކިޔުރިޓީ ޗެކިންގައި އޭނާ ބަލައި ފާސްކުރުމުގެ ތެރެއިންނެވެ. އެގޮތުން އޭނާ އޭނާގެ ދެ ފައިގެ ފަލަމަސްގަނޑުގައި ޑަކްޓްޓޭޕް އަޅާ ފޮރުވާފައި ހުރި ދެ ރަބަރު ޕެކެޓެއްގައި ޑައިފޯމިން އަދި ފިލްމު ހުސްކުރި ދަޅުތަކެއްގައި ކެނެބިސް ބަންދުކޮށްފައި ހުއްޓާ ވަނީ ފެނިފައެވެ.

މި މައްސަލައާ ގުޅިގެން ފަޞީހު ވަނީ ދައުލަތުން އުފުލި ދެ ދައުވާއަށްވެސް އިންކާރުކޮށްފައެވެ. ނަމަވެސް ދައުލަތުން ހުށަހެޅި ހެއްކާއި ޤަރީނާއަށް ބަލައި އޭނާގެ މައްޗަށް އުފުލި ދެ ދައުވާވެސް ސާބިތުވާކަމަށް ކްރިމިނަލް ކޯޓުން ވަނީ ހުކުމް ކޮށްފައެވެ.

ކެނެބިސް ޓްރެފިކް ކުރުމުގެ ކުށުގެ ދައުވާއާ ގުޅިގެން ކޯޓުން ކުރި ހުކުމުގައި ވިދާޅުވީ އޭނާގެ އަތުން ޓްރެފިކް ކުރި ކަމަށް ބުނެވޭވަރަށް ކެނެބިސް ފެނިފައިވާކަމަށް ސާބިތުވާ ކަމަށެވެ. އެހެންވެ އުމުރަށް ޖަލަށްލުމާއެކު 100،000 ރުފިޔާއިން އޭނާ ޖޫރިމަނާ ކުރުމަށް ވަނީ ހުކުމްކޮށްފައެވެ. ޖޫރިމަނާގެ ފައިސާ ދެއްކުމަށް 12 މަސްދުވަހުގެ މުއްދަތެއް ވަނީ ދީފައެވެ.

ޑައިފޯމިން ޓްރެފިކް ކުރުމުގެ ކުށުގެ ދައުވާއާ ގުޅިގެން ކޯޓުން ކުރި ހުކުމުގައިވެސް އޭނާގެ އަތުން ޑައިފޯމިން ޓްރެފިކް ކުރި ކަމަށް ސާބިތުވާވަރަށް ކެނެބިސް ފެނިފައިވާކަމަށް ވަނީ ވިދާޅުވެފައެވެ. އެހެންވެ އެ ދައުވާއާ ގުޅިގެންވެސް އުމުރަށް ޖަލަށްލުމާއެކު 100،000 ރުފިޔާއިން ޖޫރިމަނާ ކުރުމަށް ވަނީ ހުކުމްކޮށްފައެވެ.

މި ދައުވާއާ ގުޅިގެން ޖޫރިމަނާގެ ފައިސާ 12 މަސް ދުވަހުގެ ތެރޭގައި ދައްކަން ހުކުމް ކުރި ނަމަވެސް އުމުރު ދުވަހު ޖަލު ބަންދުކުރުމަށް ކުރި ހުކުމުގައި ފަޞީހު މިހާތަނަށް ބަންދުގައި ހޭދަކުރި މުއްދަތު އުނިކުރުމަށް ވަނީ ކަނޑައަޅާފައެވެ. އެ މުއްދަތު ކެނޑުމަށްފަހު ޑައިފޯމިން ޓްރެފިކް ކުރުމުގެ ކުށުގެ ދައުވާއާ ގުޅިގެން އޭނާ ދެން ޖަލުގައި ހޭދަކުރަންޖެހޭނީ 24 އަހަރާއި 4 މަސްދުވަހުގެ މުއްދަތެކެވެ.

މަސްތުވާތަކެއްޗާބެހޭ ޤާނޫނުތައް ހަރުކަށިކޮށް، ބޮޑެތި އަދަބުތައް މިހާރު ވަނީ ކަނޑައަޅާފައެވެ. އެގޮތުން، ރާއްޖެއަށް މަސްތުވާތަކެތި އެތެރެކުރާ މީހުންނަށް މަރުގެ ހުކުމް އިއްވޭނެކަމަށްވެސް ޤާނޫނުގައި ވަނީ ބަޔާންކޮށްފައެވެ.