ގދ އަތޮޅުގެ 3 ވަނަ ރިސޯޓު ނިލާ ކޮރަލް އައިލޭންޑް މޯލްޑިވްސް ހުޅުވައިފި

ގ.ދ އަތޮޅުގެ 3 ވަނަ ރިސޯޓު، ނިލާ ކޮރަލް އައިލޭންޑް މޯލްޑިވްސް ހުޅުވައިފިއެވެ. މި ރިސޯޓަކީ ގދ. ކޮޑެގަލާގައި ތަރައްޤީކޮށްފައިވާ ރިސޯޓެކެވެ.

މިރިސޯޓު ހުޅުވުމާއި ގުޅިގެން ފަތުރުވެރިކަމާ ބެހޭ ވުޒާރާއިން ވިދާޅުވީ، މިއީ ގދ. އަތޮޅުގެ ރައްޔިތުންނަށް ރަށާއި ކައިރިން ވަޒީފާގެ ފުރުސަތާއި ވިޔަފާރީގެ ފުރުސަތު ފަހިވެގެންދާނެ ކަމެއް ކަމަށެވެ. އަދި ރާއްޖެއަށް ޒިޔާރަތްކުރުމުގެ އަހަރު އަންނަ އަހަރު ފާހަގަކުރާއިރު، މި ރިސޯޓު ހުޅުވުން ވެގެންދާނީ ރާއްޖެއަށް އިތުރު ފަތުރުވެރިން ގެނެސް ފަތުރުވެރިކަމުގެ ނަފާ އިތުރު ރަށްރަށަށް ފޯރުކޮށްދޭނެ މަސައްކަތަކަށް ކަމަށް ފަތުރުވެރިކަމާއި ބެހޭ ވުޒާރާއިން ވިދާޅުވިއެވެ.

ނިލާ ކޮރަލް އައިލޭންޑް ރިސޯޓަކީ މަތީ ފަންތީގެ ފަތުރުވެރިކަމަށް ހުޅުވާފައިވާ ރިސޯޓެކެވެ. ޖުމްލަ 40 މީހުންނަށް އެއް ފަހަރާ ޚިދުމަތް ދެވޭ ގޮތަށް ފަރުމާކޮށްފައިވާ މި ރިސޯޓުގައި، މޫދަށްވާ ގޮތަށް ރަށުގައި ތަރައްޤީކޮށްފައިވާ 7 ވިލާ ހުންނާނެއެވެ. މި ވިލާތަށް 3 ގިންތިއަކަށް ބަހާލެވިފައިވެއެވެ. އެއީ 2 ކޮޓަރީގެ ވިލާއާއި، 3 ކޮޓަރީގެ ވިލާ އަދި އެންމެ މަތީ ފަންތީގެ 5 ކޮޓަރީގެ ވިލާއެވެ.

Nilaa Coral Island Maldives has opened in Gdh. Kodegalaa.

For the people of Gaafu Dhaalu, this opening means new jobs and business opportunities close to home. With Visit Maldives Year 2027 approaching, each new resort helps the Maldives welcome more visitors while bringing the benefits of tourism to more islands.

— Ministry of Tourism and Civil Aviation (@MoTmv) October 12, 2026

މި ރިސޯޓަށް މިހާރު ބުކިން ހެދުމަށް ފުރުސަތު ހުޅުވާލާފައިވާއިރު، މި ރިސޯޓަކީ މާވަރުލު އެއަރޕޯޓާއި 15 މިނެޓު ދުރުގައި އޮންނަ ރިސޯޓެއް ކަމަށް އެ ރިސޯޓުން ފާހަގަކުރެއެވެ.

މިވަގުތު ގދ. އަތޮޅުގައި އިތުރު 2 ރިސޯޓު ހިންގަމުންދެއެވެ. އެއީ އަޔާޑާ މޯލްޑިވްސް އާއި އެންއެޗް ކަލެކްޝަން މޯލްޑިވްސް ހޮވޮއްޑާ ރިސޯޓެވެ.

ފަތުރުވެރިކަމާއި ބެހޭ ވުޒާރާއިން އާންމުކޮށްފައިވާ ތަފާސް ހިސާބުތައް ދައްކާގޮތުން ރާއްޖޭގައި މިވަގުތު 180 ރިސޯޓެއްގައި 45،171 އެނދު ދަނީ އޮޕަރޭޓް ކުރަމުންނެވެ. ރާއްޖެއަށް މިހާތަނަށް 1.6 މިލިޔަން ފަތުރުވެރިން ޒިޔާރަތްކޮށްފައިވާއިރު އޭގެ ތެރެއިން 1.2 މިލިޔަން ފަތުރުވެރިންނަކީ ރިސޯޓުތަކުގައި ޗުއްޓީ ހޭދަކޮށްފައިވާ ފަތުރުވެރިންނެވެ.