ސެމީގެ ޖާގަ ކަށަވަރުވެފައިވަނިކޮށް، ޝެއިޚް ކަމާލް އިންޓަރނޭޝަނަލް ކަޕްގައި ކޮރެއާގެ ޕޮޗެއޯން އެފްސީއާ އެއްވަރުކޮށް ޓީސީ ގްރޫޕްގެ އެއްވަނަ ކަށަވަރުކޮށްފިއެވެ.
ރާއްޖޭގެ ޓީސީ ސްޕޯރޓްސް ކްލަބް ވާދަކުރާ ބައިނަލް އަޤްވާމީ ފުރަތަމަ މުބާރާތުގެ ގްރޫޕް ސްޓޭޖްގެ ފަހު މެޗު އެއްވަރުވީ 1-1 ނެވެ. މެޗުގައި ފުރަތަމަ ލަނޑު ޖެހީ ޓީސީންނެވެ. ޓީސީގެ ލަނޑު ޖެހީ ބިދޭސީ ފޯވާޑް ކޮމެލަސްއެވެ. ބަނގްލަދޭޝްގައި ކުރިއަށްދާ މުބާރާތުގެ ގްރޫޕް ސްޓޭޖްގެ ފުރަތަމަ ދެ މެޗުން މޮޅުވެ، މިއަދު މެޗު އެއްވަރުވުމުން ޓީސީއަށް ވަނީ 7 ޕޮއިންޓާއެކު ގްރޫޕްގެ އެއްވަނަ ލިބިފައެވެ.
ސެމީފައިނަލް ފުރަތަމަ މެޗުގައި ގްރޫޕް ބީގެ ދެވަނަ ޓީމާ ދެކޮޅަށް ޓީސީ ނިކުންނާނީ މިމަހުގެ 26 ވަނަ ދުވަހުއެވެ. މެޗު ފަށާނީ ރާއްޖެ ގަޑިން 17:30 ގައެވެ.
މުބާރާތުގައި ޓީސީ ފުރަތަމަ މެޗު 0-1 ން ކާމިޔާބުކުރީ ބަނގްލަދޭޝްގެ ޗެމްޕިއަން ޑާކާ އަބަހާނީއާ ވާދަކޮށެވެ. ދެވަނަ މެޗު ޓީސީ ކާމިޔާބުކުރީ ކިރްގިސްތާންގެ އެފްސީ އަލްގާއާ ވާދަކޮށް 2-1 ނެވެ.