ހޮންގ ކޮންގްއާއެކު އެކުލަވާލުމަށް މަސައްކަތްކުރާ މިނިވަން ވިޔަފާރީގެ އެއްބަސްވުމުގެ މަޝްވަރާތަކުގެ ދެވަނަ ބައްދަލުވުން، މާދަމާ ރާއްޖޭގައި ފެށުމަށް ހަމަޖެހިފައިވާ ކަމަށް އިކޮނޮމިކް މިނިސްޓްރީން ވިދާޅުވެއްޖެއެވެ.
މި ބައްދަލުވުން ކުރިއަށްދާނީ މާދަމާއިން ފެށިގެން އަންނަ ބުރާސްފަތި ދުވަހުގެ ނިޔަލަށެވެ. ބަނޑޮސް އައިލެންޑް ރިސޯޓްގައި ބާއްވާ މި މަޝްވަރާތަކުގައި އެންމެ އިސް މަންދޫބެއްގެ ގޮތުގައި ބައިވެރިވެ ވަޑައިގަންނަވާނީ، އިކޮނޮމިކް މިނިސްޓަރ މުޙައްމަދު ސައީދުއެވެ.
ހޮންގކޮންގް އާއިއެކު މިނިވަން ވިޔަފާރީގެ އެއްބަސްވުމުގެ ފުރަތަމަ މަޝްވަރާ ބައްދަލުވުންތައް ބާއްވާފައިވަނީ މިދިޔަ އަހަރުގެ ސެޕްޓެމްބަރ މަހުގެ 27 އިން 30 އަށެވެ.
މި މަޝްވަރާ ބައްދަލުވުންތަކަށް ތައްޔާރުވުމުގެ ގޮތުން، ރާއްޖޭގެ ވިޔަފާރިވެރިންނާއި، ރާއްޖެއިން މަހުގެ ބާވަތްތައް އެކްސްޕޯޓް ކުރާ ފަރާތްތަކާއެކު މިނިސްޓްރީ އިން ސިލްސިލާ ބައްދަލުވުންތަކެއް ވަނީ ބާއްވާފައެވެ. ރާއްޖޭގެ ވިޔަފާރިވެރިންނާއި ރާއްޖެއިން މަހުގެ ބާވަތްތައް އެކްސްޕޯޓް ކުރާ ފަރާތްތަކާއެކު ބޭއްވުނު ބައްދަލުވުންތަކުގެ ބޭނުމަކީ ހޮންގކޮންގްއާއެކު ވިޔަފާރި ކުރުމުގައި، އަދި އެކްސްޕޯޓް ކުރުމުގައި މިހާރު ދިމާވާ ދަތިތަކާ ބެހޭ މައުލޫމާތު ހޯދުމާއި، ދިވެހި ވިޔަފާރިވެރިން ބޭނުންވާ ކަންކަން އޮޅުން ފިލުވުމާއި، ރާއްޖެއިން ހުށަހަޅަންޖެހޭ ކަންކަމާބެހޭ ގޮތުން ވިޔަފާރިވެރިންނާ މަޝްވަރާކުރުމެވެ.
ހޮންގކޮންގް އަކީ މިހާރުވެސް ވަރަށް ބޮޑަށް ހުޅުވާލެވިފައިވާ އިޤްތިސާދަކަށް ވެފައި، ޚިދުމަތުގެ ދާއިރާގައި ބޮޑެތި ކުރިއެރުންތަކެއް ހޯދާފައިވުމާއި، ބޭންކިންގ އަދި ފައިނޭންސްގެ ދާއިރާއިން ދުނިޔޭގެ އެންމެ ފުންނާބު އުސް ބޭންކްތައް ހަރަކާތްތެރިވާ ޤައުމަކަށް ވާތީ، ބޭންކިންގ އަދި ފައިނޭންސިންގެ ދާއިރާއިން، އިތުރު އިންވެސްޓްމަންޓްތައް ރާއްޖެއަށް ގެނައުމަށް މަޝްވަރާ ކުރުމަށް ވަނީ ހަމަޖެހިފައެވެ.