ތައިލޭންޑާއި ރާއްޖެއާ ދެމެދު މިހާރަށްވުރެ ހުޅުވާލެވިފައިވާ ގޮތެއްގައި ވައިގެ ދަތުރުފަތުރުގެ ޚިދުމަތްދިނުމުގެ މަގު ތަނަވަސްކޮށްދިނުމާ ބެހޭގޮތުން، ދެޤައުމުގެ ސިވިލް އޭވިއޭޝަން އޮތޯރިޓީގެ އިސްބޭޅުން ބައިވެރިވެވަޑައިގަންނަވާ މަޝްވަރާ ބައްދަލުވުމެއް ފަށްޓަވައިފިއެވެ.
މޯލްވިސް ސިވިލް އޭވިއޭޝަން އޮތޯރިޓީގައި އިއްޔެ ފެށްޓެވި މި މަޝްވަރާ ބައްދަލުވުމުގައި ރާއްޖޭގެ ވަފުދުގެ އިސް މަންދޫބެއްގެ ގޮތުގައި ހުންނެވީ ސިވިލް އޭވިއޭޝަން އޮތޯރިޓީގެ ޗީފް އެގްޒެކެޓިވް ޙުސައިން ޖަލީލުއެވެ. ތައިލެންޑް ވަފުދުގެ އިސް މަންދޫބަކީ އެ ޤައުމުގެ ސިވިލް އޭވިއޭޝަން އޮތޯރިޓީ ޑިރެކްޓަރ ޖެނެރަލް ޗޫލާ ސުކުމަނޮޕްއެވެ.
ދެ ދުވަހުގެ މި މަޝްވަރާ ބައްދަލުވުމަށްފަހު، ދެ ޤައުމު ދެމެދު އެއްބަސްވެވޭ ނުކުތާތަކުގެ މައްޗަށް ބިނާކޮށް އެކުލަވާލެވޭ މެމޮރަންޑަމް އޮފް އަންޑަސްޓޭންޑިންގއެއްގައި ސޮއިކުރުމަށް ވަނީ ހަމަޖެހިފައެވެ.
މި ބައްދަލުވުމަކީ ދިވެހިރާއްޖެއާއި ތައިލެންޑާ ދެމެދު 21 ޑިސެންބަރު 1989 ގައި ސޮއިކޮށްފައިވާ ވައިގެ ދަތުރުފަތުރާބެހޭ އެއްބަސްވުމަށް އިޞްލާޙް ގެނެސް، ދެ ޤައުމުން ޢައްޔަންކޮށްފައިވާ އެއަރލައިންތަކަށް މިހާރަށްވުރެ ބޮޑަށް ހުޅުވާލެވިފައިވާ ގޮތެއްގައި ވައިގެ ދަތުރުފަތުރުގެ ޚިދުމަތްދިނުމުގެ މަގު ތަނަވަސްކޮށްދިނުމަށް ދެ ޤައުމު ދެމެދެ ބޭއްވޭ ވައިގެ ދަތުރުފަތުރާ ބެހޭ މަޝްވަރާ ބައްދަލުވުމެކެވެ.
ރާއްޖެއާއި ތައިލެންޑާ ދެމެދު ރާއްޖޭގެ ޤައުމީ އެއަރލައިން މޯލްޑިވިއަން އާއި ތައިލެންޑްގެ ބެންކޮކް އެއަރވޭޒްއުން ދަތުރުކުރެއެވެ. މޯލްޑިވިއަނުން ހަފްތާއަކު 6 ފްލައިޓް އަދި ބެންކޮކް އެއަރވޭޒްއިން ހަފްތާއަކު 7 ފްލަޓް މާލެ އާއި ބެންކޮކާއި ދެމެދު އޮޕަރޭޓްކުރެއެވެ.