އެސްޓީއޯގެ ޑިރެކްޓަރުންގެ ބޯޑުގައި ހިމެނޭ ޢާންމު ޙިއްސާދާރުން ތަމްސީލް ކުރާ ޑިރެކްޓަރުގެ މަގާމަށް ކުރިމަތިލުމުގެ ފުރުސަތު ހުޅުވާލައިފިއެވެ.
އެސްޓީއޯއިން ކޮށްފައިވާ އިޢުލާނެއްގައިވަނީ، މިއަހަރުން ފެށިގެން އަންނަ އަހަރުގެ ނިޔަލަށް، އެސްޓީއޯގެ ޑިރެކްޓަރުންގެ ބޯޑުގައި އާންމު ޙިއްސާދާރުންގެ ފަރާތުން ތަމްސީލުކުރުމަށް އިންތިޚާބުކުރާ ޑިރެކްޓަރު ކަމަށް ކުރިމަތިލުމުގެ ފުރުސަތު ހުޅުވާލާފައިވާ ކަމަށެވެ. މިމަޤާމަށް އެދި ކުރިމަތިލާ މީހުންނަކީ، ވިޔަފާރިއާއި ހިންގުމުގެ ދާއިރާއިން އެކަށީގެންވާ ތަޢުލީމާއި ތަޖުރިބާ ލިބިފައިވާ ބަޔަކަށް ވާންޖެހޭނެ ކަމަށް ޢިއުލާނުގައިވެއެވެ.
އެސްޓީއޯގެ ޙިއްސާ ބެހިފައިވާ ގޮތުންނާއި އެސްޓީއޯގެ ހިންގާ ޤަވާޢިދުގައި ބަޔާންކޮށްފައިވާ ގޮތުން، ޑިރެކްޓަރުންގެ ބޯޑަށް އާއްމު ޙިއްސާދާރުންގެ ފަރާތުން އިންތިޚާބު ކުރެވޭނީ އެއް ޑިރެކްޓަރެވެ. އަދި ސަރުކާރު ނުވަތަ މައި ހިއްސާދާރުގެ ފަރާތުން ހަ ޑިރެކްޓަރުން އައްޔަން ކުރަންޖެހެއެވެ.
އެސްޓީއޯގެ ބޯޑު މެންބަރުކަމަށް ކުރިމަތިލުމުގެ ފުރުސަތު މިމަހުގެ ފަންސަވީހުގެ ނިޔަލަށް ވަނީ ހުޅުވާލާފައެވެ. މިހާރު އެސްޓީއޯގެ ޕަބްލިކް ޙިއްސާދާރުން ތަމްސީލްކުރާ ޑިރެކްޓަރުގެ މަގާމުގައި ހުންނެވީ، ހ.ޓޫ ހާޓްސް، މުހައްމަދު ފަރުޝަތެވެ.