މަސްކިރުވުމަށް އިއްޔެ ގއ ކޫއްޑޫއަށް ދިޔަ ދޯނިތަކުގެ ތެރެއިން މަސް ނުކިރުވުނު ދޯނިތަކަށް ކޫއްޑޫއިން ބަދަލުދީފިއެވެ.
ޕީއެސްއެމް ނިއުސްއަށް މައުލޫމާތުދެއްވަމުން ކޫއްޑޫ ފިޝަރީޒްގެ ރީޖަނަލް މެނޭޖަރު މައްސޫދު އަހުމަދު ވިދާޅުވީ، ކޫއްޑޫއަށް މަސްކިރުވަން އައި ދޯނިތަކުގެ ތެރެއިން މަސް ނުކިރުވުނު ތޭރަ ދޯންނަކަށް ބަދަލުދީފައިވާކަމަށެވެ. މަސް ނުކިރުވުނު ދޯނިތަކަށް ބަދަލެއްގެ ގޮތުގައި ދޭއް ޕޮއިންޓް ފަހެއް މިލިއަނަށްވުރެ ގިނަ ރުފިޔާ ވަނީ ކޫއްޑޫއިން ދީފައެވެ. މިއީ ސަތޭކަ ސާދަ މެޓްރިކް ޓަނުގެ މަސްކަން ފާހަގަކޮށްލެވެއެވެ. މަސް ނުކިރުވުނު ދޯނިތަކަށް ބަދަލުދޭން ނިންމީ، ސަރުކާރުން ނިންމެވި ނިންމެވުމެއްގެ ދަށުން މަސްވެރިންނަށް އެއްވެސްކަހަލަ ނުތަނަވަސްކަމެއް ވިޔަ ނުދިނުމަށްކަމަށް މައްސޫދު ފާހަގަކުރެއްވިއެވެ.
މިކަމާއި ގުޅިގެން ޕީއެސްއެމް ނިއުސްއާއިއެކު މައުލޫމާތު ޙިއްސާކުރި ބައެއް މަސްވެރިން ބުނީ، މަސްވެރިންނަށް ކުރިމަތިވާ މިފަދަ ކުއްލި ކަންކަމުގައި އަދުގެ ސަރުކާރުން ނިންމަވާ ނިންމެވުންތަކުން މަސްވެރިންގެ ކުރިއެރުމަށް ސަރުކާރުން ވިސްނަވާ މިންވަރު ހާމަވާކަމަށެވެ. މިއީ މަސްވެރިންގެ މަސައްކަތުގައި ދެމިތިބުމަށް ލިބިގެންދާ ވަރަށްބޮޑު ހިތްހަމަ ޖެހުމެއްކަމަށް މަސްވެރިން ބުނެއެވެ. މިދުވަސްވަރު މަސްވެރިކަން ރަނގަޅުގެ މަސް ކުންފުނިތަކަށް ކިރުވާ މަހުގެ އަދަދު ވަނީ ރެކޯޑް މިންވަރަކަށް އިތުރުވެފައެވެ. މިގޮތުން މަސްކިރުވާ ތަންތަނުގެ ކެޕޭސިޓީއަށް ވުރެ އިތުރަށް މަސްކިރުވަން ލިބޭކަމަށް މަސް ކުންފުނިތަކުން ބުނެއެވެ.
ސަރުކާރުގެ މަސް ކުންފުނި މިފްކޯއިން މިހާރު ގަންނަމުންދަނީ ކޮންމެ ދޯންޏަކުން ދޭއް ޕޮއިން ފަހެއް ޓަނުގެ މަހެވެ. މިގޮތަށް ނިންމީ މިފްކޯއަށް ކިރުވާ މަހުގެ އަދަދު ވަރަށްބޮޑުތަން އިތުރުވެ، މަސްވެރިންނަށް ހަމަހަމަ އުސޫލަކުން މަސްކިރުވުމުގެ އިންތިޒާމްތައް ހަމަޖެއްސުމަށްކަމަށް އެކުންފުނިން ބުނެއެވެ. ބެންކޮކުން ރާއްޖެ އައުމަށް ދަތުރު ފަށާފައިވާ މަސްބޯޓު އަންނަމަހުގެ ތިންވަނަ ދުވަހު ކޫއްޑޫ ބަނދަރަށް އައުމުން، މަސްގަތުމުގައި މިހާރުއޮތް ހިފެހެއްޓުން ދޫކޮށްލާނޭކަމަށް މިފްކޯއިން ބުނެއެވެ.