ރާއްޖޭގައި ބާއްވާ ފުރަތަމަ ޓްރެވަލް ޓްރޭޑް ޝޯގެ ތެރެއިން ޓޫރިޒަމް ކެރިއަރ ފެއަރއެއް ކުރިއަށް ގެންދިޔުމަށް ނިންމައިފިއެވެ.
އަންނަ ޖުލައިމަހުގެ ބާރައިން ތޭރައަށް ދަރުބާރުގޭގައި ބާއްވާ ޓީޓީއެމްގެ ފުރަތަމަ ދުވަހު ކުރިއަށް ގެންދިޔުމަށް ރާވާފައިވާ ކެރިއަރ ފެއަރއަކީ، ފަތުރުވެރިކަމުގެ ދާއިރާގައި ރާއްޖޭގައި ހުރި ފުރުޞަތުތަކާއި ގުޅޭގޮތުން ކިޔަވާ ކުދިންނަށް މައުލޫމާތުދީ، ފަތުރުވެރިކަމުގެ ދާއިރާގައި މަސައްކަތްކުރަން ބޭނުންވާ ފަރާތްތަކަށް ވަޒީފާ ހޯދުމަށް، ފަތުރުވެރިކަމުގެ ސިނާޢަތުގައި ޙަރަކާތްތެރިވާ ފަރާތްތަކާއި ބައްދަލުކުރުމުގެ ފުރުޞަތު ފަހިކޮށްދިނުމުގެ ގޮތުން ބާއްވާ ފެއަރއެއްކަމަށް ޓީޓީއެމް އިންތިޒާމްކުރާ މޯލްޑިވްސް ގެޓަވޭސްއިން ހާމަކުރެއެވެ.
އަދި މި ކެރިއަރ ފެއަރގެ ސަބަބުން، ފަތުރުވެރިކަމުގެ ޚިދުމަތްދޭ ތަންތަނަށްވެސް، އެތަންތަނުގައި ހުސްވެފައިވާ ވަޒީފާތަކަށް މީހުން ހޮވުމުގެ މަސައްކަތް ފަސޭހަވެގެންދާނެ ކަމަށް ގެޓަވޭސްއިން ދެކެއެވެ.
މި ފެއަރ ކުރިއަށްދާނީ، ޢާއްމުންނަށް ހުޅުވާލައިގެން ކަމަށްވެސް ގެޓަވޭސްއިން މައުލޫމާތުދެއެވެ. ޓޫރިޒަމް ކެރިއަރ ފެއަރގެ އިތުރުން ޓީޓީއެމްގެ ތެރެއިން ހޮޓަލިއަރ ސަމިޓްއަކާއި، ޕާޓާއިން ބާއްވާ ޓްރެއިނިންގ އެއްވެސް ކުރިއަށްގެންދިޔުމަށް ވަނީ ރާވާފައެވެ.