މޯލްޑިވްސް އެސޯސިއޭޝަން އޮފް ކޮންސްޓްރަކްޝަން އިންޑަރސްޓްރީ މަސީގެ 15 ވަނަ ދައުރުގެ ރައީސަކަށް އަމިން ކޮންސްޓްރަކްޝަން ކުންފުނީގެ މެނޭޖިންގ ޑިރެކްޓަރ އަބްދުﷲ މުހައްމަދު ހޮވައިފިއެވެ.
މަސީގެ ރައީސަކަށް އަބްދުﷲ މުހައްމަދު އިންތިޚާބުކޮށްފައިވަނީ ޗަމްޕާ ސެންޓްރަލް ހޮޓަލުގައި ރޭ ބޭއްވި އެ ޖަމިއްޔާގެ މިދިޔަ އަހަރުގެ އަހަރީ އާއްމު ޖަލްސާގައެވެ. މިޖަލްސާގައި ވާހަކަދައްކަވަމުން މަސީގެ މިދިޔަ ދައުރުގެ ރައީސް މުޙައްމަދު އަލީ ޖަނާހު ވިދާޅުވީ، މިދިޔަ އަހަރަކީ ރާއްޖޭގެ އިމާރާތް ކުރުމުގެ ދާއިރާއަށާއި މަސީއަށް ކުރިއެރުންތަކެއް ލިބުނު އަހަރެއްކަމަށެވެ.
މަސީ ހިންގަމުންދަނީ، މުޅި އިންޑަރސްޓްރީގެ ލާބައަށްކަމަށާއި، އެޖަމިއްޔާއިން އެއްވެސް ފަންތިއެއްގެ ކޮންޓްރެކްޓަރުންނާއި މެދު ތަފާތުކުރުމެއް ނުގެންގުޅޭކަމަށް ޖަނާޙް ވިދާޅުވިއެވެ. އަދި މިއަދު މަސީއަކީ ސަރުކާރާއި ދިވެހި ރައްޔިތުންގެ ފުރިހަމަ އިތުބާރު ލިބިފައިވާ ޖަމިއްޔާއެއްކަމަށް އޭނާ ވިދާޅުވިއެވެ.
img:http://s2.psmnews.mv/images/660x400/14938029858605.jpg|މަސީގެ މިދިޔަ ދައުރުގެ ރައީސް މުހައްމަދު އަލީ ޖަނާޙް، އަހަރީ ރިޕޯޓް ހުށަހަޅުއްވަނީ / ފޮޓޯ: ޕީއެސްއެމް
މަސީގެ މިދިޔަ ދައުރުގެ ރައީސްގެ ވާހަކަފުޅުގައި ބައިނަލްއަޤްވާމީ މައިދާނުގައި އެޖަމިއްޔާއިން ބޮޑެތި ކާމިޔާބީތަކެއް ހާސިލްކޮށްފައިވާކަން ފާހަގަކުރެއްވިއެވެ. މިގޮތުން އިންޓަރނޭޝަނަލް ފެޑަރޭޝަން އޮފް އޭޝިއަން އެންޑް ވެސްޓަރން ޕެސިފިކް ކޮންޓްރެކްޓަރސް އެސޯސިއޭޝަނުގެ ދެވަނަ ނައިބު ރައީސް ކަމުގެ މަޤާމް މިއަހަރުގެ ޖޫންމަހު މަސީއަށް ލިބޭނެކަން ފާހަގަކުރެއްވިއެވެ.
މަސީން ރޭ ވަނީ އެޖަމިއްޔާގެ ބަޖެޓް ފާސްކޮށް، ކުރިއަށްއޮތް ދައުރުގެ ހިންގާ ކޮމިޓީ އިންތިހާބުކޮށްފައެވެ. މަސީ އަކީ ދިވެހިރާއްޖޭގެ ކޮންސްޓްރަކްޝަން އިންޑަސްޓްރީ ތަރައްޤީކޮށް ކުރިއެރުވުމަށާއި، މި ދާއިރާގައި ދިމާވާ މައްސަލަތައް ހައްލުކުރުމުގެ އިތުރަށް މިދާއިރާގައި މަސައްކަތްކުރާ ފަރާތްތަކުގެ ޙައްޤުތައް ހޯދައިދިނުމަށް 2001 ވަނަ އަހަރު އުފައްދާފައިވާ ޖަމިއްޔާއެކެވެ.