މިއަހަރުގެ ރަމަޟާންމަހަށް ޙާއްޞަކޮށް އެސްޓީއޯއިން ފިޔާ، އަލުވި އަދި ބިސް ރާއްޖެ ގެނެސްފިއެވެ.
އެސްޓީއޯ ހެޑް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން އެކުންފުނީގެ މެނޭޖިންގ ޑިރެކްޓަރު އަހުމަދު ޝަހީރު ވިދާޅުވީ، މިއަހަރުގެ ރަމަޞާންމަހަށް ޙާއްޞަކޮށް އެސްޓީއޯއިން ގެނައުމަށް ނިންމި ފިޔާ، އަލުވި އަދި ބިހުގެ ޝިޕްމަންޓް ރާއްޖެ ގެނެސްފައިވާކަމަށެވެ.
ޝަހީރު ވިދާޅުވީ، ރަމަޟާންމަހަށް ޙާއްޞަކޮށް އެސްޓީއޯއިން ގެނައި ތަކެތި އަންނަ ހޮނިހިރުދުވަހުން ފެށިގެން ވިއްކަމުންދާނޭކަމަށެވެ. ހަމަ އެދުވަހު އަތޮޅުގެ ރަށްތަކަށްވެސް މިތަކެތި ފޮނުވަމުންދާނޭކަމަށް ޝަހީރު ފާހަގަކުރެއްވިއެވެ.
img:http://s2.psmnews.mv/images/660x400/14943328727903.jpg|އެސްޓީއޯއިން މިއަދު ބޭއްވި ޕްރެސް ކޮންފަރެންސްގައި ކުންފުނީގެ މެނޭޖިންގ ޑިރެކްޓަރ މަޢުލޫމާތު ދެއްވަމުން / ފޮޓޯ: ޕީއެސްއެމް
ޝަހީރު ވިދާޅުވީ ކުރިއަށްއޮތް ރަމަޟާންމަހު ބާޒާރުގައި ފިޔާ، އަލުވި އަދި ބިހުގެ އަގުތައް އެއްވަރެއްގައި ހިފެހެއްޓުމަށް އެސްޓީއޯއިން ތައްޔާރަށް އޮތްކަމަށެވެ. އެސްޓީއޯއިން މައުލޫމާތުދެއްވާގޮތުގައި ރަމަޞާންމަހަށް އެކުންފުނިން ގެނައި ފިޔާ، އަލުވި އަދި ބިހުގެ އަގުތައް ފަހުން އާއްމުކުރާނެއެވެ. ނޫސްވެރިންނަށް މައުލޫމާތު ދެއްވަމުން އެސްޓީއޯގެ މެނޭޖިންގ ޑިރެކްޓަރު އަހުމަދު ޝަހީރު ވަނީ، މިދިޔަ އަހަރު އެކުންފުނިން ވިއްކި އަގުގައި މިފަހަރުވެސް އާއްމުނަށް ފިޔާ، އަލުވި އަދި ބިހުގެ އަގު އެއްވަރެއްގައި ގަންނަން ލިބޭނޭކަމުގެ ޔަގީންކަން ދެއްވާފައެވެ.
ރަމަޞާން މަހާއި ދިމާކޮށް މާލޭ ބާޒާރުގައި ކޮންމެ އަހަރަކުވެސް ފިޔާ، އަލުވި އަދި ބިހުގެ ޑިމާންޑް ބޮޑުވެ، މިތަކެތީގެ އަގުމައްޗަށް ދެއެވެ. ނަމަވެސް އެސްޓީއޯއިން ފިޔާ، އަލުވި އަދި ބިސް ރާއްޖެ ގެނެސް ވިއްކަން ފެށުމުން ބަޒާރުގައި މިތަކެތީގެ އަގު މައްޗަށްނުގޮސް އެއްވަރެއްގައި ހިފެހެއްޓޭކަން ފާހަގަކޮށްލެވެއެވެ.