މޯލްޑިވްސް ޕެންޝަން އެޑްމިނިސްޓްރޭޝަން އޮފީހުން އިންތިޒާމް ކުރައްވައިގެން ބޭއްވެވި މޯލްޑިވްސް ފައިނޭންސް ފޯރަމް 2017 ކާމިޔާބުކަމާއެކު ނިންމާލައިފިއެވެ. މި ފޯރަމް ބޭއްވެވީ އިއްޔެ ކުރުނބާ މޯލްޑިވްސްގައެވެ.
މޯލްޑިވްސް ފައިނޭންސް ފޯރަމް ނަމުގައި މޯލްޑިވްސް ޕެންޝަން އެޑްމިނިސްޓްރޭޝަން އޮފީހުން އެންމެ ފުރަތަމަ ފައިނޭންސް ފޯރަމެއް ބާއްވަވާފައިވަނީ 2012 ވަނަ އަހަރުއެވެ. ޕެންޝަން އޮފީހުން މައުލޫމާތުދެއްވާގޮތުގައި މޯލްޑިވްސް ފައިނޭންސް ފޯރަމް ނަމުގައި ފޯރަމެއް ބޭއްވެވުމުގެ މައިގަނޑު މަޤްޞަދަކީ، ރާއްޖޭގެ މާލީ ދާއިރާގައި ހުރި ދަތިތައް ދެނެގަނެ، އެކަންކަމަށް ޙައްލުހޯދޭނޭ ޕްލެޓްފޯމެއް ޤާއިމްކުރެއްވުމެވެ.
މިފަހަރުގެ މޯލްޑިވްސް ފައިނޭންސް ފޯރަމް ޝަރަފްވެރިކޮށްދެއްވީ އޮޑިޓަރ ޖެނެރަލް ޙަސަން ޒިޔަތުއެވެ. ފައިނޭންސް ފޯރަމް ޝަރަފްވެރިކޮށްދެއްވައި ވާހަކަފުޅު ދައްކަވަމުން އޮޑިޓަރ ޖެނެރަލް ޙަސަން ޒިޔަތު ވަނީ، ދިވެހިރާއްޖޭގެ އިޤްތިޞާދަށް ބޭރުގެ އިންވެސްޓަރުން ޝައުޤުވެރިކުރުވުމަށްޓަކައި ޕްރޮފެޝަނަލް ގޮތެއްގައި ފަންޑު މެނޭޖްކޮށް އޭގެ ނަފާ އިތުރުކުރުމަކީ، މިވަގުތަށް ވަރަށް މުހިއްމުކަން ފާހަގަކުރައްވާފައެވެ.
މިގޮތުން ބޭރުގެ އިންވެސްޓަރުން ޝައުޤުވެރި ކުރުވުމަށްޓަކައި ޕްރޮފެޝަނަލް ގޮތެއްގައި ފަންޑު މެނޭޖުކުރުމުގެ އިތުރަށް ރިސްކް މެނޭޖްކުރުމަކީ މިވަގުތު ދިވެހިރާއްޖޭގެ އިޤްތިޞާދަށް ވަރަށް މުހިއްމު ކަމެއް ކަމަށް އޮޑިޓަރ ޖެނެރަލް ވިދާޅުވިއެވެ.
ޕެންޝަން ފަންޑާ ބެހޭގޮތުން އޮޑިޓަރ ޖެނެރަލް ޙަސަން ޒިޔަތް ވިދާޅުވީ، ޕެންޝަން ފަންޑަކީ ގިނަބައެއްގެ ޙައްޤުތަކެއް އެކުލެވޭ ފަންޑަކަށް ވާތީ، މި ފަންޑު ބެލެހެއްޓުމުގައި ވަރަށް ބޮޑަށް ބައްލަވަންޖެހޭ ކަމަށެވެ. މިކަން ކުރުމުގައި ހުރިހާ ފަރާތްތަކުންވެސް ޕެންޝަން އެޑްމިނިސްޓްރޭޝަން އޮފީހުގެ މިނިވަންކަމަށް އިޚްތިރާމް ކުރެއްވުމަށާއި އެ މިނިވަންކަން ޙިމާޔަތްކޮށްދިނުމަށް ކަމާބެހޭ ފަރާތްތަކަށް އޮޑިޓަރ ޖެނެރަލް ވަނީ އިލްތިމާސް ކުރައްވާފައެވެ. ހަމަ އެއާއެކު މި ކަމުގައި ހުރިހާ ފަރާތެއްގެ އެއްބާރުލުން ޕެންޝަން އެޑްމިނިސްޓްރޭޝަން އޮފީހަށް ބޭނުންވާ މިންވަރު ފާހަގަކުރައްވައި، މި ކަމުގައި އެންމެން އެއް އަމާޒަކަށް މަސައްކަތް ކުރުމަކީ މުޅި ޤައުމުގެ މަސްލަޙަތަށްޓަކައި ނުހަނު ބޭނުންތެރިކަމެއް ކަމަށްވެސް އޮޑިޓަރ ޖެނެރަލް ވިދާޅުވިއެވެ.
މިފަހަރުގެ ފައިނޭންސް ފޯރަމުގައި ދިވެހިރާއްޖޭގެ ފައިނޭންސް ދާއިރާގައި ޙަރަކާތްތެރިވާ ސަރުކާރުގެ މުއައްސަސާތަކާއި ކުންފުނިތަކާއި އަމިއްލަ ކުންފުނިތަކުން ވަނީ ބައިވެރިވެފައެވެ. މި ފޯރަމްގައި ވަރލްޑް ބޭންކުންވެސް ވަނީ ބައިވެރިވެފައެވެ. ވަރލްޑް ބޭންކްގެ ފަރާތުން މި ފޯރަމްގައި ބައިވެރިވެވަޑައިގަތީ، ހެޑް އޮފް ގްލޯބަލް ޕެންޝަން އިންވެސްޓްމަންޓް އެޑްވައިޒަރީ ޕްރޮގްރާމް ސުދިރް ރާޖްކުމާރެވެ.
މި ފޯރަމްގައި ޓެކްނޮލޮޖީގެ އަލީގައި މާލީ ދާއިރާއަށް އައިސްފައިވާ ބަދަލުތަކާއި، އިންޑަސްޓްރީއެއްގެ ގޮތުގައި ރާއްޖޭގައި މާލީ ދާއިރާ ކުރިއެރުވިދާނެ ގޮތްތަކާ ބެހޭގޮތުން މަޢުލޫމާތު ބަދަލުކޮށްފައިވާކަން ފާހަގަކޮށްލެވެއެވެ. މޯލްޑިވްސް ޕެންޝަން އެޑްމިނިސްޓްރޭޝަން އޮފީހުން އިންތިޒާމް ކުރައްވައިގެން ބޭއްވެވި މިފަހަރުގެ ފައިނޭންސް ފޯރަމްގެ މެއިން ސްޕޮންސަރަކީ އެލައިޑެވެ.
ދިވެހިރާއްޖޭގެ ޕެންޝަން ފަންޑަކީ މިވަގުތު ރާއްޖޭގައި އޮތް އެންމެބޮޑު އިންވެސްޓްމަންޓް ފަންޑެވެ. މި ފަންޑްގެ ޖުމްލަ ޢަދަދު 9 ބިލިއަނަށް އަރައެވެ.