ތެލުގެ ޑިއުޓީ 10 ޕަސެންޓުން 5 ޕަސަންޓަށް ކުޑަކުރުމާ ގުޅިގެން، އެސްޓީއޯއިން ވިއްކާ ޕެޓްރޯލާއި ޑީސަލްގެ އަގު ހެޔޮކޮށްފިއެވެ.
އެގޮތުން އެސްޓީއޯއިން ވަނީ ޑީސަލް ލީޓަރަކުން 51 އެއްލާރި އަގުހެޔޮކޮށްފައެވެ. އަދި ޕެޓްރޯލް ލީޓަރަކުން ވަނީ 31 ލާރި އަގު ހެޔޮކޮށްފައެވެ.
އެސްޓީއޯއިން ވިއްކާ ޕެޓްރޯލާއި ޑީސަލްގެ އަގު ހެޔޮކުރުމާ ގުޅޭގޮތުން ނޫސްވެރިންނަށް މަޢުލޫމާތުދެމުން، އެސްޓީއޯގެ މެނޭޖިންގެ ޑިރެކްޓަރ އަޙްމަދު ޝަހީރު ވިދާޅުވީ 8.95 ރުފިޔާއަށް ވިއްކަމުން އައި ޑީސަލް ލީޓަރުގެ އަގު މިހާރު 8.45 ލާރިއަށް އަގު ހެޔޮކޮށްފައިވާ ކަމަށެވެ. އަދި 8.95 ރުފިޔާއަށް ވިއްކަމުން އައި ޕެޓްރޯލް ލީޓަރެއްގެ އަގު މިހާރު 8.65 ރުފިޔާއަށް ހެޔޮކޮށްފައިވާ ކަމަށް ޝަހީރު ވިދާޅުވިއެވެ.
ޝަހީރު ވިދާޅުވީ ތެލުގެ އަގަށް މި ބަދަލު ގެނައުމަށް އެސްޓީއޯއިން ނިންމީ ސަރުކާރުން ތެލުގެ ޑިއުޓީ ކުޑަކުރެއްވުމާއި ގުޅިގެން ކަމަށް. އަދި މޭ މަހުން ފެށިގެން ސްޓެލްކޯ އާއި ފެނަކައަށް ތެޔޮ ފޯރުކޮށްދޭ ފަރާތަކީ އެސްޓީއޯ ކަމަށް ހަމަޖައްސާފައިވުމާއެކު، އެސްޓީއޯގެ ތެލުގެ ވިޔަފާރީގެ ފައިދާ އިތުރުވެ، އާންމު ރައްޔިތުންނަށް ތެޔޮ ވިއްކާ އަގު އިތުރަށް ހެޔޮ ކުރުމުގެ ފުރުޞަތު ލިބިގެންގޮސްފައިވާކަމަށެވެ.
ޝަހީރު ވިދާޅުވީ މި ބަދަލާ އެކު މިފްކޯ މެދުވެރިކޮށް، މަސްވެރިންނަށް ވިއްކާ ތެލުގެ އަގަށްވެސް ހެޔޮ ބަދަލެއް އަންނާނެ ކަމަށެވެ.
ހުސްވި ހަފްތާ ތެރޭ ރައްޔިތުންގެ މަޖިލީހުންވަނީ އިމްޕޯޓް އެކްސްޕޯޓްގެ ޤާނޫނަށް އިސްލާހު ގެނެސް ތެލުން ނަގާ ޑިއުޓީ ދިހަ ޕަސެންޓުން ފަސް ޕަސެންޓަށް ކުޑަ ކުރުމަށް ފާސްކުރައްވާފައެވެ.