އެމް.އޭ.ސީ.އެލްއިން ވިއްކާ ޖެޓް ފިއުލްގެ އަގު ހެޔޮކޮށްފިއެވެ.
މޯލްޑިވްސް އެއަރޕޯޓްސް ކޮމްޕެނީ ލިމިޑެޓް، އެމްއޭސީއެލުން ބުނީ ޖެޓް ފިއުލްގެ އަގު ހެޔޮކުރުމަށް ނިންމީ ދިވެހިރާޢްޖޭގެ އިމްޕޯޓް އެކްސްޕޯޓު ގާނޫނަށް ގެނައި އިސްލާހާއި އަދި ބައިނަލްއަގުވާމީ ބާޒާރުގައި ތެލުގެ އަގަށް އައިސްފައިވާ ބަދަލުތަކާ ގުޅިގެންކަމަށެވެ.
އެމްއޭސީއެލުން ބުނީ އެތެރޭގެ އުދުންހުންތަކުގައި ބޭނުންކުރާ ޑޮމެސްޓިކް ފްލައިޓްތަކަށާއި، ބައިނަލްއަގްވާމީ ފްލައިޓްތަކަށް އެއް އަގެއްގައި ޖެޓް ފިއުލް ވިއްކަން އެކުންފުނިން ނިންމާފައިވާކަމަށެވެ. ޑޮސެމްޓިކް ފްލައިޓްތަކަށް މިހާތަނަށް ޖެޓް ފިއުލް ވިއްކަމުން އައީ ބައިނަލްއަޤްވާމީ ފްލައިޓްތަކަށްވުރެއް ދިހައެއް އިންސައްތަ ބޮޑު އަގެއްގައި ނަމަވެސް ދެން ޑޮމެސްޓިކް އަދި އިންޓަރނޭޝަނަލް ފްލައިޓްތަކަށް ޖެޓް ފިއުލް ވިއްކުމަށް ހަމަޖެހިފައިވަނީ އެއް އަގެއްގައިކަމަށްވެސް އެމްއޭސީއެލުން ބުނެއެވެ.
މި ބަދަލާއެކު ޑޮމެސްޓިކް ފްލައިޓްތަކަށް ޖެޓް ފިއުލް ލީޓަރެއް ދެން ވިއްކަނީ، ލީޓަރެއް 10.68 ރުފިޔާއަށެވެ. މިއީ ކުރީގެ އަގާ އަޅާބަލާއިރު، 74 ލާރި ހެޔޮ އަގެކެވެ.
އިންޓަނޭޝަނަލް ފްލައިޓްތަކަށްވެސް މިހާރު ޖެޓް ފިއުލް ލީޓަރެއް ވިއްކަނީ، 10.68 ރުފިޔާއަށެވެ. މިއީ ކުރީގެ އަގާ އަޅާބަލާއިރު 36 ލާރި ހެޔޮ އަގެކެވެ.