ރާއްޖޭގެ ފުރަތަމަ މިއުޒިކް ސްޓްރީމިންގް އެޕް ދިރާގުން ތަޢާރަފްކޮށްފިއެވެ.
"ޔޮންޑާ މިއުޒިކް"ގެ ނަމުގައި ތައާރަފްކުރި މި އެޕްލިކޭޝަންގެ ސަބަބުން ރާއްޖޭގެ މިއުޒިކް އިންޑަސްޓްރީއަށް ބޮޑު ކުރިއެރުންތަކެއް ލިބިގެންދާނެކަމަށް ދިރާގުން ބުނެއެވެ.
ދިރާގުގެ މިއުޒިކް ސްޓްރީމިންގ އެޕް ތައާރަފްކުރުމަށް ބޭއްވި ރަސްމިއްޔާތުގައި ދިރާގުގެ ސީއީއޯ އިސްމާޢީލް ރަޝީދު ވިދާޅުވީ، ދިވެހިރާއްޖޭގެ މިއުޒިކް އިންޑަސްޓްރީގައި މަސައްކަތްކުރާ ޒުވާނުންނަށް މި އެޕްލިކޭޝަންގެ ސަބަބުން އިތުރު އުންމީދުތަކެއް ގެނެސްދޭނެކަމަށެވެ. މި އެޕްލިކޭޝަން ތަޢާރަފްކުރުމާއެކުވެސް ވިހި މިލިއަނަށްވުރެ ގިނަ ލަވަ ވަނީ ހިމަނާފައެވެ.
ގޫގަލް ޕްލޭ އަދި އެޕް ސްޓޯރުން މިހާރު މި އެޕްލިކޭޝަން ޑައުންލޯޑް ކުރެވޭނެއެވެ. ދިރާގުން އަބަދުވެސް މިއުޒިކް ދާއިރާ ކުރިއެރުވުމަށް މަސައްކަތް ކުރާނެކަމަށާއި، މިއީ އޭގެ އަލިގަދަ ހެއްކެއް ކަމަށް އެ ކުންފުނިން ބުނެއެވެ.