ވަރކް ވިސާގެ ދަށުން ރާއްޖޭގައި މަސައްކަތްކުރުމަށް ހުއްދަދީފައިވާ އުސޫލުތަކާ ޚިލާފަށް ފިލައިގެން އުޅޭ ބިދޭސީންގެ ބޭނުން ބައެއް ވިޔަފާރިތަކުން ވަރަށް ބޮޑަށް ކުރަމުންދާކަމަށާ، ޤަވާޢިދާ ޚިލާފަށް އުޅޭ ބިދޭސީން ބޭނުންކޮށްގެން ޚިދުމަތް ހޯދާ ވިޔަފާރިތަކަކީ ކޮބައިކަން ދެނެގަނެ، އެފަދަ ވިޔަފާރިތަކާމެދު ފިޔަވަޅުއަޅާނެކަމަށް މިނިސްޓްރީ އޮފް އިކޮނޮމިކް ޑިވެލޮޕްމަންޓުން ހާމަކޮށްފިއެވެ.
ޤާނޫނުތަކާއި، ޤަވާޢިދުތަކާއި އުސޫލުތަކާ ޚިލާފަށް ވިޔަފާރިތަކުން ބިދޭސީ މަސައްކަތުމީހުން ބޭނުންކުރުމަކީ ވަޒީފާދޭ ފަރާތްތަކަށް ފިލައިގެން ދިއުމާއި، ބިދޭސީން އަމިއްލައަށް ގްރޫޕްތައް ހަދައިގެން ޤަވާޢިދުތަކާ ޚިލާފަށް އުޅުމަށް މަގުފަހިވާކަމެއްކަމަށް އިކޮނޮމިކް މިނިސްޓްރީއިންބުނެއެވެ.
ފިލައިގެން އުޅޭ ބިދޭސީން ނުވަތަ ވަރކް ވީސާގެ އުސޫލުތަކާއި ޚިލާފަށް ރާއްޖޭގައި މަސައްކަތްކުރާ ބިދޭސީން އަމިއްލައަކަށް ހަދައިގެން އުޅޭ ގްރޫޕްތަކުގެ ޚިދުމަތް، ޕަބްލިކް އަދި ޕްރިވެޓް ސެކްޓަރ ވިޔަފާރިތަކުން ހޯދަމުންދާކަން އެ މިނިސްޓްރީއަށް ފާހަގަވެފައިވާ ކަމަށާއި ބައެއް ވިޔަފާރިތަކުން ކުރާ މިފަދަ ޢަމަލުތަކަކީ، ރާއްޖެއަށް މަސައްކަތްކުރުމަށް އެތެރެވާ ބިދޭސީ މަސައްކަތުމީހުންނަށް ވަޒީފާއާބެހޭ ޤާނޫނުން ކަށަވަރުކޮށްދީފައިވާ ހައްޤުތައް ޔަޤީންކޮށްދިނުމަށް ކުރިމަތިވާ ގޮންޖެހުމެއްކަމަށްވެސް އިކޮނޮމިކް މިނިސްޓްރީން ބުނެއެވެ.
ޤަވާއިދާ ޚިލާފައްއުޅޭ ބިދޭސީންގެ ކިބައިން ވިޔަފާރިތަކުން އެގޮތަށް ހޯދާ ޚިދުމަތްތަކަކީ، ޒިންމާ ނަގާނެ ވަޒީފާ ދޭ ފަރާތެއް ނެތުމުގެ ސަބަބުން، އިންސާނީ ވަގުފާރީގެ ޝިކާރައަކަށް ބިދޭސީ މަސައްކަތުމީހުން ހުށަހެޅިގެން ދިއުމަށް މެދުވެރިވާ ސަބަބެއްކަމުގައިވެސް އިކޮނޮމިކް މިނިސްޓްރީއިންބުނެއެވެ.
ޤަވާއިދާ ޚިލާފަށް އުޅޭ ބިދޭސީން މަސައްކަތުމީހުންގެ މައްސަލަތައް އިމިގްރޭޝަނަށް ހުށަހަޅައިގެން އެމީހުންނަކީ ޤަވާއިދާއެއްގޮތަށް ރާއްޖޭގައި މަސައްކަތްކުރާ ބަޔަކަށް ހެދުމުގެ ފުރުޞަތު ވަޒީފާދޭ ފަރާތްތަކަށް އޮތްކަން އިކޮނޮމިކް މިނިސްޓްރީން ފާހަގަކުރެއެވެ.
ފިލައިގެން ނުވަތަ ވަރކް ވިސާގެ ޤަވާއިދުތަކާ ޚިލާފަށް ޚިދުމަތް ފޯރުކޮށްދޭ ބިދޭސީ މަސައްކަތުމީހުންގެ ޚިދުމަތް ލިބިގަންނަ ވިޔަފާރިތައް ދެނެގަތުމުގެ މަސައްކަތް، ސަރުކާރުގެ ކަމާގުޅުން ހުރި އިދާރާތަށް ގުޅިގެން، އިކޮނޮމިކް މިނިސްޓްރީއިން ގެންދަނީ ކުރަމުންނެވެ.