ހައި ސްޕީޑް ލޯންޗުގެ ޚިދުމަތް އަތޮޅުތަކަށް ދޭން ފެށުމަށް އެމްޓީސީސީން ނިންމައިފިއެވެ.
މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ، އެމްޓީސީސީގެ އަހަރީ ޢާއްމު ޖަލްސާގައި އެ ކުންފުނީގެ ސީއީއޯ އިބްރާހީމް ޒިޔާތު ވިދާޅުވީ އަތޮޅުތަކުގައި ގެސްޓްހައުސް ވިޔަފާރި ކުރިއަރަމުން އަންނައިރު، ފަތުރުވެރިންނަށް އަމާޒްކޮށްގެންނާއި އަދި ޢާއްމު ރައްޔިތުންނަށް ހައި ސްޕީޑް ލޯންޗް ޚިދުމަތްދޭން ފެށުމަށް ނިންމާފައިވާކަމަށެވެ. އަދި މާލެއާއި ހުޅުމާލެއާއި ދެމެދުގެ ދުއްވާ ޕްރިމިއަމް ފެރީތަކުގެ އަދަދު އިތުރުކުރުމަށްވެސް އެމްޓީސީސީން ނިންމާފައިވާ ކަމަށް ޒިޔާތު ވިދާޅުވިއެވެ.
އެމްޓީސީސީން އަންނަނީ ރާއްޖޭގެ ފަސް ޒޯނެއްގައި ފެރީގެ ޚިދުމަތް ދެމުންނެވެ. އެކުންފުނީގެ ފެރީގެ ޚިދުމަތް ދުވާލަކު ސަތޭކަ ހަތްހާސް މީހުން ބޭނުންކުރެއެވެ.
އެމްޓީސީސީން ވަނީ 2017 ވަނަ އަހަރު ދެބިލިއަން ރުފިޔާގެ ވިޔަފާރިކުރުމަށް އަމާޒު ހިފާފައެވެ. އަދި މި އަމާޒަށް ވަޞިލްވުމަށްޓަކައި މީގެ ކުރިން ކޮށްފައި ނުވާ ވަރުގެ އިންވެސްޓްމަންޓްތަކެއް ކޮށް، ވިޔަފާރި ފުޅާކުރުމަށް އެކުންފުނިން ވަނީ ރާވާފައެވެ.