އެސްޓީއޯގެ ބޭސް ފިހާރަތަކުގައި ހުންނަ ބައެއް ބޭސްތައް ނުގަނެ ގިނަދުވަސްވުމުގެ ސަބަބުން މުއްދަތު ހަމަވެ، ގިނަ ޢަދަދެއްގެ ބޭސް އުކާލަން ޖެހޭތީ ބޭސް މެނޭޖްކުރުމުގެ ކަންތައްތައް އިތުރަށް ހަރުދަނާ ކުރުމުގެ މަސައްކަތް ކުރަމުންދާ ކަމަށް އެކުންފުނިން ބުނެފިއެވެ.
އެސްޓީއޯއިން އަންނަނީ ރާއްޖޭގެ މީހުން ދިރިއުޅޭ ހުރިހާ ރަށެއްގައި ބޭސް ފިހާރަތައް ހިންގަމުންނެވެ. އެކުންފުނީގެ މެނޭޖިން ޑިރެކްޓަރު އަޙްމަދު ޝަހީރު ވިދާޅުވީ އެހާ ގިނަ ރަށްރަށަށް ބޭސް ސަޕްލައި ކުރުމުގައި ބޮޑެތި ގޮންޖެހުންތައް އެބަހުރި ކަމަށެވެ. އެސްޓީއޯގެ ހުރިހާ ބޭސް ފިހާރައެއްގައިވެސް ޒަރޫރީ ބޭސްތަކުގެ ސްޓޮކް ވަކި މިންވަރަކަށް ބަހައްޓަން ޖެހޭ ކަމަށާ، އެ ބޭސްތައް ގަތަސް ނުގަތަސް އެ ބޭސްތަކުގެ ސްޓޮކް ބަހައްޓަން ޖެހޭ ކަމަށް އޭނާ ވިދާޅުވިއެވެ.
ބޭހުގެ މުއްދަތު ހަމަވެ އުކާލަންޖެހުމުން އެސްޓީއޯއަށް މާލީގޮތުން ބޮޑެތި ގެއްލުންތަކެއް ވިޔަސް އެނޫންގޮތެއް މިޙާލަތުގައި ނެތްކަމަށް ޝަހީރު ވިދާޅުވިއެވެ. އެހެން ކަމުން މިކަމަށް ހައްލެއް ހޯދުމަށް ބޭސް މެނޭޖް ކުރުމުގެ ކަންތައްތައް ހަރުދަނާ ކުރުމުގެ މަސައްކަތް ކުރަމުންދާ ކަމަށް އޭނާ ވިދާޅުވިއެވެ.
ޝަހީރު ވިދާޅުވީ އެސްޓީއޯގެ ބޭސް ފިހާރަތަކުގައި ތިބޭ ފާމަސިސްޓުންނަށް ތަމްރީން ދިނުމުގެ ޕްރޮގްރާމްތައްވެސް ކުރިއަށް ގެންދާ ކަމަށާ، ހުއްދަ ނެތް މީހުންނާއި، ބޭސް ވިއްކުމުގެ ފެންވަރު ނެތް މީހުން އެސްޓީއޯގެ ބޭސް ފިހާރަތަކުގައި ބޭސް ވިއްކުމަށް ނުތިބޭނެ ކަމަށެވެ.
ދެހާސް ފަނަރ ވަނަ އަހަރުގެ ފަހުކޮޅު އެސް.ޓީ.އޯ.އިން ވަނީ ރާއްޖޭގައި މީހުން ދިރިއުޅޭ ހުރިހާ ރަށެއްގައި އާސަންދައިގެ ޚިދުމަތް ފޯރުކޮށްދޭ ބޭސްފިހާރަތައް ޤާއިމްކޮށް ޚިދުމަތް ދޭންފަށާފައެވެ.