މުދާ ކްލިއަރ ކުރުމަށް ހޭދަވާ ވަގުތު ދެނެގަތުމާގުޅޭ ތަމްރީން ޕްރޮގްރާމެއް މޯލްޑިވްސް ކަސްޓަމްސް ސާރވިސްއިން ފަށައިފިއެވެ. މިއީ މުދާ ކްލިއަރ ކުރުމަށް ހޭދަވާ ވަގުތު ދެނެގަތުމަށްޓަކައި ކުރާ ސަރވޭ ނުވަތަ "ޓައިމް ރިލީސް ސްޓަޑީ" ހެދުމަށް ތައްޔާރުވުމުގެ ގޮތުން ބާއްވާ ތަމްރީން ޕްރޮގްރާމެކެވެ.
5 ދުވަހުގެ މުއްދަތަށް ހިންގާ މި ތަމްރީން ޕްރޮގްރާމްގައި 38 ފަރާތަކުން ބައިވެރިވެއެވެ. މީގެތެރޭގައި ކަސްޓަމްސް އާއި އިމްޕޯޓް އެކްސްޕޯޓާގުޅޭ ކަންތައްތަކުގައި ހަރަކާތްތެރިވާ ސަރުކާރުގެ އިދާރާތަކާއި އެހެނިހެން ފަރާތްތައް ހިމެނެއެވެ.
މި ޕްރޮފްރާމްގައި ކިޔަވާދޭނީ ދުނިޔޭގެ ކަސްޓަމްސް ޖަމްއިއްޔާގެ ކަމާގުޅޭ މާހިރުންކަމަށް ކަސްޓަމްސްއިން މައުލޫމާތުދެއެވެ.
މުދާ ކްލިއަރކުރުމަށް ހޭދަވާ ވަގުތު ނުވަތަ "ޓައިމް ރިލީސް ސްޓަޑީ" އަކީ އިމްޕޯޓް އެކްސްޕޯޓާގުޅޭ ކަންތައްތައް ތަރައްޤީކޮށް ލުއިފަސޭހަ ކޮށްފައިވާ މިންވަރު ދެނެގަތުމަށް ދުނިޔޭގެ ވަރަށް ގިނަ ޤައުމުތަކުގައި ކުރިއަށްގެންދާ ސަރވޭއެކެވެ. މި ސަރވޭގެ ސަބަބުން އިމްޕޯޓް އެކްސްޕޯޓް މުދާ ކްލިއަރކުރުން ހަރުދަނާކުރުމަށް ކޮށްފައިވާ މަސައްކަތާއި ހޯދާފައިވާ ކުރިއެރުންތައް ވަޒަންކުރެވިގެން ދާނެކަމަށް ކަސްޓަމަސްއިން މައުލޫމާތު ދެއެވެ.