ކުދި ވިޔަފާރިއާއި މެދުފަންތީގެ ވިޔަފާރިތަކަށް ޚާއްސަކޮށްގެން އެކޮނޮމިކް މިނިސްޓްރީން ކުރިއަށްގެންދާ އެސްއެމްއީ ފައިނޭންޝިއަލް ފޯރަމްގެ ތިންވަނަ ފޯރަމް އަންނަ ހޮނިހިރު ދުވަހު ހދ. ކުޅުދުއްފުށީގައި ބޭއްވުމަށް ހަމަޖައްސައިފިއެވެ.
ރީޖަނަލް އެސްއެމްއީ ފައިނޭންޝަލް ފޯރަމް 2017 ގެ ނަމުގައި އެކޮނޮމިކް މިނިސްޓްރީން ބާއްވަމުން އަންނަ މި ފޯރަމްތަކުގެ މައިގަނޑު ބޭނުމަކީ ވިޔަފާރިއެއް ފަށަން ބޭނުންވާ ފަރާތްތަކަށާއި، މިހާރު ފަށައިފައިވާ ވިޔަފާރިތަކަށް ފައިނޭންސް ހޯދާނެގޮތްތަކާއި ބެހޭގޮތުން މަޢުލޫމާތު ދިނުމެވެ.
ކުޅުއްދުއްފުށީގައި ބާއްވާ ފޯރަމް ޙާއްސަކޮށްފައިވަނީ ހަމައެކަނި ހދ އަތޮޅުގެ ފަރާތްތަކަށް ކަމަށް އެކޮނޮމިކް މިނިސްޓްރީން މައުލޫމާތުދެއެވެ. މި ފޯރަމުގައި، ބޭންކުތަކުން ފައިނޭންސް ފޯރުކޮށްދޭ ގޮތްތަކާއިބެހޭގޮތުންވެސް މަޢުލޫމާތުދިނުމަށް ހަމަޖެހިފަވެއެވެ. އެގޮތުން އިސްލާމިކް ބޭންކާއި ބެންކް އޮފް މޯލްޑިވްސްގެ އިތުރުން މޯލްޑިވްސް މަނިޓަރީ އޮތޯރިޓީންވެސް މަޢުލޫމާތު ޙިއްސާ ކުރާނެއެވެ. އެއްދުވަހުގެ މުއްދަތަކަށް ކުރިއަށްދާ މި ފޯރަމްގެ ތެރެއިން ނެޓްވޯކިންގ ސެޝަންތައްވެސް ކުރިއަށްދާނެކަމަށް އެކޮނޮމިކް މިނިސްޓްރީން މައުލޫމާތުދެއެވެ.
މިއީ އިކޮނޮމިކް މިނިސްޓްރީއާއި އެންޓަޕްރައިޒް ޑިވެލޮޕްމަންޓާއި ގުޅިގެން ކުރިއަށްގެންދާ ފޯރަމެކެވެ. މި ފޯރަމްގައި، އަލަށް ވިޔަފާރިއެއް ފަށާނެގޮތާއި މިހާރު ފަށާފައިވާ ވިޔަފާރިތައް އިތުރަށް ކުރިއަރުވާނެގޮތުގެ މުހިންމު މަޢުލޫމާތުތައް ހިއްސާކުރާނެއެވެ.
މީގެ ކުރިން އިކޮނޮމިކް މިނިސްޓްރީން ވަނީ މިފަދަ ފޯރަމެއް އައްޑޫ ސިޓީގެ ހިތަދޫގައާއި މީމު އަތޮޅު މުލަކުގައިވެސް ބާއްވާފައެވެ.
އިކޮނޮމިކް މިނިސްޓްރީން އަންނަނީ ކުދި ވިޔަފާރިއާއި މެދުފަންތީގެ ވިޔަފާރިތައް ކުރިއެރުވުމަށްޓަކައި ތަފާތު ގިނަ ހަރަކާތްތަކެއް ހިންގަމުންނެވެ. އެގޮތުން ވިޔަފާރިއެއް ފަށަން ބޭނުންވާ ފަރާތްތަކަށް ލޯނުދޫކުރުމާއި ރާއްޖޭގެ އެކި ހިސާބުތަކުގައި ވިޔަފާރި ފަށައިގެން ކުރިއަށްގެންދާނެގޮތުގެ މަޢުލޫމާތު ދިނުމަށް ހިންގާ ޕްރޮގްރާމްތައް ފާހަގަކޮށްލެވެއެވެ.