މޯލްޑިވްސް ޓްރެވެލް އެޖެންޓްސް އެންޑް ޓުއަރ އޮޕަރޭޓާރސް (މަޓާޓޯ) އިން މިމަހު ބޭއްވުމަށް ހަމަޖެހިފައިވާ 2 ތަމްރީން ޕްރޮގުރާމްގައި ބައިވެރިވުމުގެ ފުރުސަތު ހުޅުވާލައިފިއެވެ. ފަތުރުވެރިކަމުގެ ދާއިރާއަށް ޙާއްސަ ކޮށްގެން ބާއްވާ މި ދެ ތަމްރީންގެ ތެރޭގައި ހިމެނެނީ ކަސްޓަމަރުންނަށް ޚިދުމަތްދޭނެ ގޮތް ދަސްކޮށްދިނުމާއި މި ދާއިރާގެ މަސައްކަތް މެނޭޖްކުރާނެގޮތް ދަސްކޮށްދިނުމުގެ ތަމްރީން ތަކެކެވެ.
މަޓާޓޯއިން ބުނީ އެއްދުވަހުގެ މުއްދަތަކަށް ކުރިއަށްގެންދާ މި 2 ތަމްރީން ޕްރޮގްރާމް ގައި ބައިވެރިވުމުގެ ފުރުސަތު ހުރިހާ ފަރާތްތަކަށްވެސް ހުކުރު ދުވަހާއި ހަމައަށް ހުޅުވާލާފައިވާކަމަށެވެ.
ޗަންޕާ ސެންޓްރަލް ހޮޓެލްގައި ބާއްވާ މި ތަމްރީންތައް އޮންނާނީ މިމަހުގެ 13 އަދި 14 ވަނަ ދުވަހުއެވެ. ކޮންމެ ޕްރޮގްރާމެއްގައިވެސް ބައިވެރިވުމުގެ ފުރުސަތު 60 ފަރާތަށް ލިބޭނެކަމަށް މަޓާޓޯއިން ބުނެއެވެ.
މި ތަމްރީންތައް ކުރިއަށްގެންދާނީ ސުރީލަންކާގެ ޓްރެއިނިންގ އިންސްޓިޓިއުޓެއް ކަމަށްވާ މެކުއަރެންސް އެންޑް ޖޯންސްއާއި ގުޅިގެންނެވެ. މަޓާޓޯއާއި މެކުއަރެންސް އެންޑް ޖޯންސްއާއި ގުޅިގެން މީގެ ކުރިންވެސް ވަނީ ރާއްޖޭގައި ތަފާތު 6 ތަމްރީން ޕްރޮގުރާމް ހިންގާފައެވެ. މަޓާޓޯއިން އަންނަނީ ރާއްޖޭގެ ފަތުރުވެރިކަން ޕްރޮމޯޓްކުރުމަށް ގިނަ މަސައްކަތްތަކެއް ކުރަމުންނެވެ. އެގޮތުން އަންނަ އަހަރު ބައިނަލްއަޤްވާމީ 19 ފެއަރއެއްގައި ބައިވެރިވުމަށް އެ އެސޯސިއޭޝަނުން ވަނީ ނިންމާފައެވެ.