ފަސް ރުފިޔާގެ ކަރުދާސްނޫޓް ވިޔަފާރީގެ ބޭނުންތަކަށް ބޭނުންކުރެވޭނެ އެންމެ ފަހުގެ ތާރީޚަކީ މިމަހުގެ ނިޔަލަށްކަމަށް މަރުކަޒީ ބެންކް މޯލްޑިވްސް މަނިޓަރީ އޮތޯރިޓީން ބުނެފިއެވެ. އެމްއެމްއޭއިން ބުނީ 5 ރުފިޔާގެ ކަރުދާސްނޫޓް 31 ޑިސެމްބަރ 2017 ގެ ފަހުން ވިޔަފާރީގެ ބޭނުންތަކަށް ބޭނުން ނުކުރެވޭނެކަމަށެވެ. ނަމަވެސް 31 ޖުލައި 2021 އާއިހަމައަށް އެމްއެމްއޭއިން 5 ރުފިޔާގެ ކަރުދާސްނޫޓް ބަދަލުކުރެވޭނެކަމަށް މަރުކަޒީ ބެންކުން މައުލޫމާތުދެއެވެ. އެހެންކަމުން މިކަމަށް ސަމާލުވުމަށް އެ އިދާރާއިން ވަނީ އިލްތިމާސްކޮށްފައެވެ.
އެމްއެމްއޭއިން 5 ރުފިޔާގެ ޕޮލިމާ ނޫޓް ބާޒާރަށް ނެރެފައިވަނީ މިއަހަރުގެ އޮގަސްޓް މަހުގެ 10 ވަނަ ދުވަހުއެވެ. ފަސްރުފިޔާގެ ނޫޓަކީ ރަންދިހަ ފަހެއް ސީރީޒްގެ އެންމެ ފަހުން ނެރުނު ނޫޓެވެ. ރާއްޖޭގެ މިނިވަންކަމަށް 50 އަހަރު ފުރުނު ރަންޔޫބީލާ ގުޅުވައިގެން އެމްއެމްއޭއިންވަނީ ދިވެހި ފައިސާގެ އާ ނޫޓު ސީރީޒް ނެރެފައެވެ. މި ސީރީޒްގައި ޖުމްލަ 7 ނޫޓު ހިމެނެއެވެ. މި 7 ނޫޓަކީވެސް ކުރިން ބޭނުންކުރަމުންދިޔަ ކަރުދާސް ނޫޓުތަކުގެ ބަދަލުގައި ނެރެފައިވާ ފެންވަރު ރަނގަޅު އަދި ސަލާމަތީގޮތުން ރައްކާތެރި ގިނަ ފިޔަވަޅުތަކެއް އެކުލެވޭ ޕޮލިމާ ނޫޓުތަކެކެވެ.