ޢުމްރާއަށް މީހުން ގެންދަން ޝައުގުވެރިވާ ކުންފުނިތަކުން އެކަމަށް އެދި ޕްރޮޕޯސަލް ހުށަހެޅުމުގެ މުއްދަތު މިނިސްޓްރީ އޮފް އިސްލާމިކް އެފެއަރޒުން އިތުރު ކޮށްފިއެވެ.
އިސްލާމިކް މިނިސްޓްރީން ބުނީ މުއްދަތު އިތުރުކޮށްދިނީ މިމަހުގެ 31 ވަނަ ދުވަހަކީ ސަރުކާރުގެ ރަސްމީ ބަންދުދުވަހަކަށް ހަމަޖައްސާފަވާތީ ކަމަށެވެ. ރާއްޖެއިން އުމްރާއަށް މީހުން ގެންދިޔުމަށް ޝައުގުވެރިވާ ދިވެހި ކުންފުނިތަކުން މިހާރު އެކަމަށް އެދި ޕްރޮޕޯސަލް ހުށަހަޅަންޖެހޭނީ އަންނަ ޖަނުއަރީ މަހުގެ ހަތަރުވަނަ ދުވަހުގެ ނިޔަލަށް ކަމަށް އިސްލާމިކް މިނިސްޓްރީން ބުނެއެވެ.
ޢުމްރާއަށް މީހުން ގެންދިޔުމާބެހޭ އުސޫލުގައިވާގޮތުން ކޮންމެ ކުންފުންޏަކަށްވެސް ހުށަހެޅޭނީ ގިނަވެގެން އެއް ޕްރޮޕޯޒަލެވެ. އެއް ކުންފުންޏަކުން އެއް ޕްރޮޕޯޒަލަށްވުރެ ގިނަ ޕްރޮޕޯޒަލް ހުށަހަޅައިފިނަމަ، އެ ކުންފުންޏެއްގެ ހުރިހާ ޕްރޮޕޯޒަލެއް ބާޠިލްވާނެއެވެ. ޕްރޮޕޯޒަލްތައް އިވެލުއޭޓްކުރާނީ މިނިސްޓްރީން ޢައްޔަންކުރާ ތިން މެންބަރުންގެ މައްޗަށް އެކުލެވޭ ކޮމިޓީއަކުންނެވެ. ޕްރޮޕޯޒަލްތައް އިވެލުއޭޓްކޮށް ނިމުމުން މާކްސް ދިން ގޮތް ހާމަކޮށް ރަޖިސްޓަރީ ކުރުމަށްފަހު ހޮވޭ ކުންފުނިތައް ޢިއުލާންކުރަންވާނެ ކަމަށް މި އުސޫލުގަ ބަޔާންކޮށްފައިވެއެވެ.