ތަޢުލީމީ ނިޒާމްގައި ދަރިވަރުންނަށް ރިވެތި އަދަބުތައް ދަސްކޮށްދިނުމަށްޓަކައި ރާއްޖެއިން ބޭރުގެ މުދައްރިސުން ގެންނަން ނުޖެހޭކަމަށާއި، ދިވެހިންގެ އަދަބުތައް ދަރިވަރުންނަށް އުނގަންނައިދޭނީ ދިވެހި މުދައްރިސުންކަމަށް ޑރ.އަޝްރަފް އަބަދުއްރަޙީމް ވިދާޅުވެއްޖެއެވެ.
މި ހަފްތާގެ "ހުކުރު އުފާ"ގެ ރޭގަނޑު ދަންފަޅީގެ މަޢުޟޫއަކީ "ގެއްލިފައިވާ އިޖްތިމާޢީ އަދަބުތައް"އެވެ. މި މަޢުޟޫޢަށް ވާހަކަދައްކަވަމުން ޑރ.އަޝްރަފް ޢަބްދުއްރަޙީމް ވިދާޅުވީ ކާބަފައިން ގެނެސްދިން ރިވެތި އަދަބުތައް ދަމަހައްޓަން ބޭނުންވާނަމަ، އެކަންކުރެވޭނީ އަދުގެ ޖީލުގެ ދަރިންނަށް އެކަންތައްތައް ރަނގަޅަށް ކިޔައިދީގެންކަމަށެވެ. އެގޮތުން ތަޢުލީމީ ނިޒާމުގައިވެސް ދިވެހިން ކިޔައިދެވޭ ހުރިހާ މާއްދާއެއް ދިވެހިން ކިޔައިދުނުމަށް އިލްތިމާސްކުރެއްވިއެވެ. އަދި އެކުދިންނަށް މި އާދަތައް ދަސްކޮށްދެވޭނީ ދިވެހި ސިކުޑިއަކުން، އިނގިރޭސިބަހުގެ ބަދަލުގައި ދިވެހި ބަސް ބޭނުންކޮށްގެންކަމަށެވެ. ޑރ.އަޝްރަފް ޢަބްދުއްރަޙީމް ވަނީ ގެއްލިގެންދާ އިޖުތިމާޢީ އަދަބުތައް އަށަގެންނެވުމަށް ސްކޫލްތަކާއި، ބެލެނިވެރިންނާއި ފޮތްތަކުގެ އިތުރުން މިޑިއާގެ ރޯލްވެސް މުހިއްމުކަމަށް ވިދާޅުވެފައެވެ.
"ދިވެހިރާއްޖޭގެ ތާރީޚާއި ، ދިވެހިން އުޅުނު ގޮތް، ދިވެހިންގެ ވެށި ދިވެހި ދަރިވަރުންނަށް ކިޔައިދެވޭނީ ދިވެހި ބަހުން. ދިވެހި ސިކުނޑިއަކުން." ޑރ.އަޝްރަފް ޢަބްދުއްރަޙީމް ވިދާޅުވިއެވެ.
ކުރިން ދިވެހި މުޖުތަމަޢު އޮތް ރިވެތި އާދަތަކާއި އަދަބުތައް ފާހަގަކުރައްވާ އޭނާ ވިދާޅުވީ ބައެއް ރަށްރަށުގައި މިއާދަތައް ފެންނަމުންދިޔަނަމަވެސް މިހާރު މި އާދަތަކާއި އަދަބުތައް ދިވެހި މުޖުތަމަޢުގެ ތެރެއިން ގެއްލިގެންދާކަމަށެވެ. ދިވެހިންގެ ތެރޭގައި އޮތް ރިވެތި އަޚްލާގައި އަދަބުތަކަކީ ސިޔާސީ ފިކުރެއްނެތި އަޅުގަނޑުމެންގެ ކާބަފައިން ހިފަހައްޓާފައިވާ ރީތި ސިފައެއްކަން އަޝްރަފް ފާހަގަކުރެއްވިއެވެ. އިސްލާމް ދީނަކީ ސާފުތާހިރުކަމުގެ ދީނެއްކަން ފާޙަގަކުރައްވާ އަޝްރަފް ވިދާޅުވީ މުޖުތަމަޢުގެ ތެރޭގައި ސާފުތާހިރުކަންވެސް އޮންނަންޖެހޭނެކަމަށާއި އެހެންނަމަވެސް މިހާރު އެހާލަތުވެސް ބަދަލުވަމުންދާކަން ފާހަގަކޮށް އޭނާ ވަނީ ދިވެހި ދަރިންނަށް މިކަމާމެދު ވިސްނާ ފިކުރުކޮށް، ކުރިން އަޅުގަނޑުމެންގެ ގައިގައި ހިފަފައިވާ އާދަތައް އާލާކުރުމަށް އިލްތިމާސްކޮށްފައެވެ.
" ޒަމާނަށް އަންނަމުންދާ ބަދަލުތައް ބަލައިގަތުމާއިއެކު އިސްލާމީ ރިވެތި އާދަތަކާއި އުސޫލްތައް ދިވެހިންގެ ތެރޭގައި ދެމެހެއްޓުމާއި ރީތި ގިތްތަކުގައި ހިފުން މުހިއްމު" ޑރ. އަޝްރަފް ޢަބްދުއްރަޙީމް ވިދާޅުވިއެވެ.
ދިވެހިންގެ ރިވެތި އާދަތައް ފެންނަން ފަށާފައިވަނީ މީގެ އެތައް އަހަރެއްކުރިން އިސްލާމްދީން ރާއްޖެގައި ފެތުރުމާގުޅިގެކަމަށާއި އިސްލާމްދީނާ ޚިލާފަށް އެހެންދީންތަކުގައި ސާފުތާހިރުކަން ގެއްލިގެން ހިނގައިދާނެ އެތައްކަންތައްތަކެއް ފެންނަން ހުރިކަމަށްވެސް ޑރ.އަޝްރަފް އަބްދުއްރަޙީމް ފާހަގަކުރެއްވިއެވެ.