އިސްލާމިކް މިނިސްޓްރީ އާއި ޕަބްލިކް ސަރވިސް މީޑިއާ ގުޅިގެން ބާއްވާ ހުކުރު އުފާ މިއަދާއި މިރޭވެސް އޮންނާނެއެވެ. މި ހަފްތާގެ ހުކުރު އުފާގައި ދަރުސް ދެއްވާނީ މެލޭޝިޔާގެ އިސްލާމިކް ޔުނިވަރސިޓީގެ ޕްރޮފެސަރ ޑރ ދާވޫދު އަބްދުލްމާލިކް ޔަހުޔާ އަލް ހިދާބީ އެވެ. އޭނާ ވާހަކަ ދައްކަވާނީ "އިސްލާމިކް ސޯޝަލް ވެލިއުސް، އެން އެޑިއުކޭޝަނަލް އެޕްރޯޗް" ތަޢުލީމީ ނަޒަރަކުން އިސްލާމީ އިޖްތިމާޢި އަދަބުތައް މި މައުޟޫޢަށެވެ.
ޑރ. ދާވޫދު އަބްދުލްމާލިކް ޔަހުޔާ އަލް ހިދާބީ އަކީ ޔަމަނުގެ ބޭފުޅެކެވެ.
ހުކުރު އުފާގެ މި ހަފްތާގެ ފެސްޓިވަލްގައި މިއަދު ހަވީރު ހަތަރަކުން އިރު އޮއްސި ހަޔަކަށް ކުޑަކުދިންނަށް ޚާއްޞަ ގިނަ ހަރަކާތްތަކެއް ކުރިޔަށްދާނެއެވެ. އެހެން ހަފްތާތަކޭ އެއްގޮތަށް މިހަފްތާގައިވެސް މިފެސްޓިވަލްގެ ތެރޭގައި ދީނީ ފޮތްތަކާއި މުސްޙަފު ބެހުންވެސް އޮންނާނެއެވެ. މީގެ އިތުރުން ތަފާތު ސްޓޯލްތަކުން ދީނީ މަޢުލޫމާތު ހިމެނޭ ފޮތްތައް ވިއްކުމާއި، ކުޑަކުދިންނަށާއި ބޮޑެތިމީހުނަށް ދީނީ މަޢުލޫމާތު ދިނުންވެސް ކުރިއަށްދާނެއެވެ.