ޖެންޑަރ މިނިސްޓަރ ޒެނީޝާ ޝަހީދު ޒަކީ ދ.ކުޑަހުވަދޫއަށް ވަޑައިގެން އެ ރަށުގައި ހުންނަ ފެމިލީ އެންޑް ޗިލްޑްރަންސް ސަރވިސް ސެންޓަރަށް ޒިޔާރަތްކުރައްވައިފިއެވެ.
މި ޒިޔާރަތުގައި އެ ސެންޓަރުގެ މުވައްޒަފުންނާއި ބައްދަލުކުރައްވާ އެ ސެންޓަރުން ދެމުންގެންދާ ޚިދުމަތްތައް އިތުރަށް ހަރުދަނާކުރުމާ ގުޅޭގޮތުން މަޝްވަރާ ކުރައްވާފައިވޭ. އަދި ދ.އަތޮޅު ހޮސްޕިޓަލަށް މިނިސްޓަރ ޒިޔާރަތްކުރައްވައި، އެ ހޮސްޕިޓަލްގެ މެނޭޖްމަންޓާއި، ދޮށީ އުމުރުގެ މީހުންނަށް އަމާޒުކޮށްގެން މިނިސްޓްރީން ކުރިއަށް ގެންދިޔަ ރަންވޭލާ ކެމްޕޭންގެ ހެލްތު ސްކްރީނިންގ ޕްރޮގްރާމްގެ ބައިވެރިންނާ ބައްދަލުކުރެއްވިއެވެ.
މިނިސްޓަރ ޒެނިޝާ ދ.ކުޑަހުވަދޫއަށް ކުރެއްވި ދަތުރުފުޅުގައި، ދ.އަތޮޅު ކައުންސިލާއި، ކުޑަހުވަދޫގެ ކައުންސިލްގެ މެންބަރުންނާ ވެސް ވަނީ ބައްދަލުކުރައްވާފައެވެ. އަދި ކުޑަކުދިންނާއި، އުމުރުން ދުވަސްވީ މީހުންނާއި، ނުކުޅެދުންތެރިކަން ހުންނަ ފަރާތްތަކަށް ޚިދުމަތް ދިނުމުގައި އެ މުއައްސަސާތަކާ ގުޅިގެން މިނިސްޓްރީން ކުރިއަށް ގެންދެވިދާނެ ހަރަކާތްތަކާ ގުޅޭގޮތުން ޚިޔާލު ބަދަލުކުރައްވާފައިވެއެވެ.
މިނިސްޓަރގެ މި ދަތުރުފުޅުގައި،ދ.އަތޮޅުގައި ޤާއިމްކޮށްފައިވާ ރީޖަނަލް ކޮމާންޑް ޕޮލިސް ސްޓޭޝަންގެ ބޭފުޅުންނާ ވެސް ބައްދަލުކުރައްވައި، ގުޅިގެން ކުރިއަށް ގެންދެވޭނެ ހަރަކާތްތަކާ ގުޅޭގޮތުން މަޝްވަރާކުރެއްވިއެވެ.
.