ބައިނަލް އަޤުވާމީ އަންހެނުންގެ ދުވަސް ފާހަގަކުރުމުގެ ގޮތުން ވިލާ ކޮލެޖުން ޚާއްސަ ޑައިވިން ޙަރަކާތެއް ކުރިއަށްގެންގޮސްފިއެވެ.
"ޝީ ޑައިވްސް" ގެ ނަމުގައި މިއަދު ހެދުނު ހަޔަކުން އެގާރައަށް ރަސްފަންނުގައި ކުރިޔަށްގެންދިޔަ މިޙަރަކާތް އިންތިޒާމްކޮށްފައިވަނީ ވިލާ ކޮލެޖުގެ ފެކަލްޓީ އޮފް މެރިން ސައިންސުންނެވެ.
އަންހެނުންނާއި އަންހެން ކުދިނަށް ޚާއްޞަކޮށްގެން ކުރިޔަށްގެންދިޔަ މި ޙަރަކާތުގެ މައިގަނޑު މަޤްޞަދަކީ، ޢާއްމުކޮށް އަންހެނުން މަސައްކަތް ކުރާ ދާއިރާތައް ނޫން އެހެން ދާއިރާތަކުގައި ހަމަހަމަކަމާއެކު މަސައްކަތް ކުރުމަށް އަންހެނުންނަށް އެހީވުމަށް ވިލާ ކޮލެޖުން ކުރަމުންދާ މަސައްކަތްތައް މި ޙަރަކާތުގެ ތެރެއިން އަންހެނުންނާއި އަންހެން ކުދިންނަށް ތަޖުރިބާ ފުރުޞަތު ފަހިކޮށްދިނުމެވެ.
ޕީއެސްއެމް ނިއުސްއަށް މަޢުލޫމާތުދެއްމުން ވިލާ ކޮލެޖުގެ ފެކަލްޓީ އޮފް މެރިން ސައިންސްގެ ޑީން ޑރ. ޝަމާ އަބްދުލް ޙަމީދު ވިދާޅުވީ "ޝީ ޑައިވްސް" ޙަރަކާތުގައި ބައިވެރިވުމަށް ފުރުޞަތު ހުޅުވާލުމާގުޅިގެން ގިނަ ޢަދަދެއްގެ އަންހެނުން ޝައުވެރިކަން ފާޅުކުރި ކަމަށާއި ގިނަ ޢަދަދެއްގެ އަންހެނުންނާއި ޑައިވް އިންސްޓްރަކްޓަރުން ބައިވެރިވިކަމަށެވެ.
"އަޅުގަނޑުމެން އިއްޔެ މެންދުރުގެ ނިޔަލަށް ބައިވެރިވުމުގެ ފުރުޞަތު ހުލުވާލިން. 140 ކުރިމަތި ލި. އެހެންނަމަވެސް ދިމާވި އެކި ކަންތަތައްތަކުގެ ސަބަބުން ނާދެވުނު " ޑރ. ޝަމާ އަބްދުލް ޙަމީދު ވިދާޅުވިއެވެ.
ބައިނަލް އަޤުވާމީ އަންހެނުންގެ ދުވަސް ފާހަގަ ކުރުމުގެ ގޮތުން ރާއްޖޭގެ އެކި ސަރަޙައްދުތަކުގައި ދަނީ ތަފާތު ޙަރަކާތްތައް ހިންގަމުނުންނެވެ. ސްކޫލްތަކާއި، އޮފީސްތަކާއި އަދި އަމިއްލަ ޖަމްޢިއްޔާ ޖަމާއަތްތަކުންވެސް މި ދުވަސް ފާހަގަކުރަމުންދާކަން ފާހަގަކުރެވެއެވެ. ބައިނަލް އަޤުވާމީ އަންހެނުންގެ ދުވަސް ފާހަގަކުރަނީ ކޮންމެ އަހަރެއްގެވެސް މާރޗްމަހުގެ 8 ވަނަ ދުވަހުއެވެ.