ރާއްޖޭގައި ހިންގާ ޖަމިއްޔާ ޖަމާޢަތްތަކުގެ ކަންކަން ބެލެހެއްޓުމުގެ މަސައްކަތް މިނިސްޓްރީ އޮފް ޔޫތު، ސްޕޯޓްސް އެންޑް ކޮމިއުނިޓީ އެމްޕަވަރމަންޓްގެ ދަށަށް ބަދަލުކޮށްފިއެވެ.
އެ މިނިސްޓްރީން ނެރުނު އިޢުލާނެއްގައި ބުނެފައިވަނީ މިނިސްޓްރީ އޮފް ހޯމް އެފެއަރޒްގެ މަސައްކަތްތަކުގެ ތެރޭގައި ހިމެނޭ ޖަމްޢިއްޔާ ޖަމާޢަތްތަކާ ގުޅޭ އެންމެހާ މަސައްކަތްތަކާއި ކޮމިއުނިޓީ އޯގަނައިޒޭޝަންގެ މަސައްކަތްތަކާއި ގުޅޭ ކަންކަން އެ މިނިސްޓްރީގެ ދަށަށް ބަދަލުކޮށްފައިވާކަމަށެވެ. އަދި އެ މަސައްކަތްތައް ކުރުން މިމަހުގެ 2 ވަނަ ދުވަހުން ފެށިގެން ޔޫތު މިނިސްޓްރީގެ ދަށަށް ރައީސުލްޖުމްހޫރިއްޔާ ކަނޑައަޅުއްވާފައިވާކަމަށްވެސް އެ އިޢުލާންގައިވެއެވެ.
ރައީސުލްޖުމްހޫރިއްޔާ ގެންނެވި މި ބަދަލާއެކު ޖަމްޢިއްޔާތަކާއި ގުޅޭ ގޮތުން ކުރެވޭ މަސައްކަތްތައް މިމަހުގެ 6 ވަނަ ދުވަހުންފެށިގެން ޔޫތު މިނިސްޓްރީން ކުރަމުންގެންދާނެކަމަށްވެސް އެ މިނިސްޓްރީން ބުނެއެވެ.
ޖަމްޢިއްޔާ ޖަމާއަތްތަކުގެ މަސައްކަތްތައް މީގެ ކުރިން ބަލަމުންދިޔައީ ހޯމް މިނިސްޓްރީންނެވެ. އެގޮތުން ޖަމްޢިއްޔާތައް އުފެއްދުމުގެ ހުއްދައާއި ކުރާ މަސައްކަތްތައްވެސް ބަލަމުންދިޔައީ ހޯމް މިނިސްޓްރީންނެވެ.