ރާއްޖޭގެ މަދަނީ ޖަމިއްޔާތައް ބާރުވެރިކުރުވުމުގެ ގޮތުން ބާއްވާ "ހަވަލި ފެއަރ" ފަށައިފިއެވެ. ދަރުބާރުގޭގައި ކުރިއަށްގެންދާ މި ފެއަރ ފައްޓަވައިދެއްވީ އިކޮނޮމިކް މިނިސްޓަރ ފައްޔާޟް އިސްމާއީލްއެވެ.
މަދަނީ ޖަމިއްޔާތައް ބާރުވެރިކުރުވުމަށް ކުރެވިދާނެ ކަންކަމާ ގުޅޭ ގޮތުން މަޝްވަރާކޮށް ޚިޔާލު ބަދަލުކުރުމަށް ބާއްވާ މި ފެއަރގައި ވ. އަތޮޅު ފިޔަވައި ރާއްޖޭގެ ހުރިހާ އަތޮޅެއްގެ މަދަނީ ޖަމިއްޔާތަކުގެ ތެރެއިން 100 އަށްވުރެ ގިނަ ޖަމިއްޔާއިން ބައިވެރިވެއެވެ.
ހޯމް މިނިސްޓްރީން އިންތިޒާމް ކޮށްގެން ކުރިއަށް ގެންދާ މި ފެއަރ ކުރިއަށް ދާނީ މިއަދުން ފެށިގެން ފެށިގެން މިމަހުގެ 18 ވަނަ ދުވަހުގެ ނިޔަލަށެވެ. ހޯމް މިނިސްޓްރީން ވިދާޅުވީ މި ފެއަރގައި ބައިވެރިވާ ފަރާތްތަކަށް ޚާއްޞަ ތަމްރީނުތަކެއް ދިނުމަށް ނިންމާފައިވާ ކަމަށެވެ.
ރާއްޖޭގައި ހަރަކާތްތެރިވާ މަދަނީ ޖަމިއްޔާތަކަށް އަމާޒުކޮށްގެން މިފަދަ ފެއަރއެއް ބޭއްވުމުގެ މައިގަނޑު މަގްޞަދަކީ ޖަމިއްޔާތަކުން ރާވައި ހިންގުމަށް ކަނޑައަޅާ ޕްރޮގްރާމްތައް ހިންގުމަށް ފަންޑު ހޯދޭނެ ވަސީލަތެއް ޤާއިމްކޮށް، ޕްރޮޖެކްޓްތައް ސްޕޮންސަރ ކުރާނެ ފަރާތްތައް ދެނެގަނެ އެހީހޯދުމަށް މަގުފަހިކުރުމާއި، މެންބަރޝިޕް އިތުރުކުރުމާއި، މަޢުލޫމާތު ޙިއްޞާކުރުމާއެކު ޖަމިއްޔާތަކުގެ މެދުގައި ގުޅުން ބަދަހިކުރެވޭނެ މާހައުލެއް ޤާއިމުކުުން ކަމަށް ހޯމް މިނިސްޓްރީން ވިދާޅުވެއެވެ.
މި ފެއަރގެ ފުރަތަމަ ދުވަސް ޢާންމުންނަށް ޚާއްޞަ ކުރެވިފައިވާއިރު ދެވަނަ ދުވަސް އަމާޒުކުރެވިފައި ވަނީ ބޮޑެތި ވިޔަފާރި ނުވަތަ ކޯޕަރޭޓް ދާއިރާ ތަމްސީލްކުރާ ފަރާތަކާއި ކުންފުނިތަކަށެވެ. އަދި އެންމެ ފަހު ދުވަސް ކުރިއަށް ގެންދަން ނިންމާފައި ވަނީ ސްކޫލް މަދަރުސާތަކާއި ޔުނިވަރސިޓީތަކާއި ކޮލެޖް ފަދަ ތަންތަނުގައި ތަޢުލީމް ޙާޞިލްކުރަމުން އަންނަ ދަރިވަރުންނަށް ޚާއްޞަކޮށްގެންނެވެ.
އެކި ދާއިރާތަކުން މަސައްކަތްކުރާ ޖަމިއްޔާތައް ގުޅުން ބަދަހި ކުރުވުމާއި، ގުޅިގެން މަސައްކަތްކުރެވޭނެ މާހައުލެއް ފަހިކޮށްދިނުމާއި، ވިޔަފާރިވެރިންނާއި އެހިދޭ ފަރާތްތަކާ ގުޅުވައިދިނުމާއި، ދަރުމަވެރިން އިތުރުކުރުމާއި، ޖަމްޢިއްޔާތަކާ މީޑިއާތަކާ ދެމެދު ގުޅުން ޤާއިމުކުރުންވެސް މި ފެއަރގެ ތެރޭގައި ކުރިއަށްދާ ކަންކަމުގެ ތެރޭގައި ހިމެނެއެވެ.
މަދަނީ ޖަމިއްޔާތަކަށް ޚާއްޞަކޮށްގެން ފެއަރއެއް ބޭއްވުމަކީ ސަރުކާރުގެ 100 ދުވަހުގެ ވަޢުދުތަކުގެ ތެރޭގައި ހިމެނޭކަމެކެވެ.