މާލޭގައި ބޭނުންކުރަމުންދާ ޢާންމު ފާޚާނާތަކަކީ ޢާއްމު ރައްޔިތުންނަށާއި ޚާއްސަކޮށް މާލެއައިސް އުޅޭ ދަތުރުވެރިނާއި ފަތުރުވެރިންނަށް ޚާޢްސަކޮށްފައިވާ ތަންތަން. އެހެންނަމަވެސް މިހާރު މިތަންތަންތަންހުރީ މިއިން އެއްވެސް ބަޔަކު ބޭނުންކުރަން ހެޔޮވާވަރުގެ ހާލަތެއްގައެއް ނޫންކަމުގައި ދަންވަން ޖެހޭ.
ޢާއްމުކޮށް އެންމެންނަށް ހުޅުވާލާފައިހުންނަ ފާޚާނާތަކެއް މާލޭގެ އެކިސަރަހައްދުތަކުގައި ހުރިއިރު އެތަންތަނުގެ ހަޑިމުޑުދާރުކަން އިންތިހާއެވެ. މާލޭގައި އެކިތަންތަނުގައި ހަދާފައިވާ މިފަދަ ފާޚާނާތަކުގެ މުޑުދާރުކަމާއި އެތަންތަނުގެ ޙާލަތު ދަށްކަމުގެ ޝަކުވާއަކީ ޢާއްމުން އަބަދުހެން ކުރަމުންދާ ޝަކުވާއެކެވެ. އަދި މިގޮތަށް ހުރި ގިނަފާޚާނާތައް ހުރީ ބޭނުންކުރެވޭ ވަރަށްވުރެ މާދަށް ޙާލަތެއްގައެވެ. ބައެއް ފާޚާނާތަކުގެ ފާރުތަކާއި ދޮރުފަތްތަކުގައި ބޭއަދަބީ ބަސްތައްވެސް ލިޔެފައިހުރެއެވެ.
ބައެއް ޕޭޓޮއިލެޓްތަކުގެ ދޮރާއި ތަންޑުފަދަ ތަކެތި ނުހުންނައިރު، އަނެއްބައި ތަންތަނުގައި ފާޚާނާ ތައްޓަށާއި ފުލެޝްޓޭންކަށްވެސް ގެއްލުންތައް ދީފައި ހުރެއެވެ. ތަނުގެ ވެންޓިލޭޝަން އެހައި ދަށްއިރު، ފެން ނުހިނދި ގިނަދުވަސްވުމުގެ ސަބަބުން މުޅި ތަޅުންގަނޑު އޮންނަނީ ތަޢައްޔަރުވެފައެވެ. ފާހާނާތަކުގެ ވަހާއި ކުލަ އެހައި ހަޑިއެވެ.
މިތަނަށް ކޮންމެމީހަކު ވަތްނަމަވެސް ދުވާވަހަށް ކެތް ނުކުރެވޭނެއެވެ. ފާޚާނާތަކުގެ ޙާލަތު ބަލާލުމަށް އަޅުގަނޑު ގޮސް އުޅުމުގެ ތެރޭގައި އެތަނުން ދިމާވި ބައެއް މީހުން ބުނީ އެތަންތަން ބޮޑަށް ހަލާކުވެ ސާފުތާހިރުކަން ކުޑަވެފައިވަނީ އެތަންތަނުގެ ތެރޭގައި ބައެއްމީހުން މަސްތުވާތަކެތި ބޭނުންކުރާތީއާއި، އެތަންތަން ބޭނުންކުރާ ބިދޭސީންގެ ސާފުތާހިރުކަން ކުޑަވުމުގެ ސަބަބުންކަމަށެވެ.
މިމައްސަލަ ޙައްލުކުރަށް މިހާރު މާލެ ސިޓީ ކައުންސިލުން މަސައްކަތް ފަށާފައިވާކަމަށް އެކައުންސިލުން ވިދާޅުވެއެވެ. މާލޭގެ އެކި ސަރަޙައްދުތަކުގައި އަލުން ޢާއްމު ފާޚާނާ ބަރިތަކެއް ތަރައްޤީކުރުމަށް ސިޓީ ކައުންސިލުން މިހާރު ވަނީ ނިންމާފައެވެ.
ސިޓީ ކައުންސިލުން ވިދާޅުވީ، މާލޭގައި ހުރި ހުސްތަންތަނުގައި ޚާއްސަކޮށް ފަތުރުވެރިން އެންމެ ގިނައިން ގޮސްއުޅޭ ސަރަޙައްދުތަކުގައި ޕޭ ޓޮއިލެޓްތައް ތަރައްޤީކުރުމުގެ ޕްލޭންތައް އެކުލަވާލަމުންދާކަމަށެވެ. އަދި އެފަދަ ފާޚާނާތަކަކީ ސާފުތާހިރުކަމާއެކު ދެމެހެއްޓެނިވިގޮތަކަށް ބެލެހެއްޓިގެންދާނެ ކަމަށްވެސް ކައުންސިލުން ވިދާޅުވެއެވެ.
މާލެސިޓީގެ ޑެޕިއުޓީ މޭޔަރ ޝަމާއު ޝަރީފް ވިދާޅުވީ، މިހާރު ހުރި ފާޚަނާތައް ދޫކޮށްފައިވާ ފަރާތްތަކުގެ އެގްރީމެޓްތަކާއި، އެ ފާޚާނާތަކުގެ ވަރަށް ތަފްސީލީ އިންސްޕެކްޝަނެއް ހަދަމުންދާކަމަށެވެ.
"ކުރިން ސިޓީކައުންސިލުން މި ފާޚާނާތައް ބަލަހައްޓަމުން ދިޔަނަމަވެސް ވޭތުވެ ދިޔަ ސަރުކާރުން އައިސް ކަންކަން ބަދަލުވުމުގެ ސަބަބުން އެފަދަ ތަންތަނަށް މާބޮޑު އަޅާލުމެއް ދީފައެއް ނުވޭ. މިފަހަރު އެންމެ ބޮޑަށް ސަމާލުކަން މިދެނީ މިކުރަނީ އެއްނަންބަރު ޖެޓީ ސަރަޙައްދުގައި ފާޚާނާތައް ޤާއިމްކުރަން. ފަތުރުވެރިން އިތުރުވާވަރަކަށް މިފަދަ ފާޚާނާތައްވެސް އިތުރުވާން ޖެހޭ." ޝަމާއު ވިދާޅުވިއެވެ.
ފަތުރުވެރިންގެ އިތުރުން، މާލެއަށް ޒިޔާރާތްކުރާ މީހުންނާއި އެކި ބޭނުންތަކުގައި މަގުތަކުގައި އުޅޭ މީހުންވެސް ޢާއްމު ފާޚާނާ ބޭނުންކުރަންޖެހޭއިރު، ފާޚާނާތަކުގެ ހާލަތު ވަނީ ބޭނުންނުކުރެވޭވަރަށް ގޯސްވެފައެވެ. މާލޭގެ ފާޚާނާ ބަރިތަކަކީ ސިޓީ ކައުންސިލުން އަމިއްލަ ބަޔަކާއި ހަވާލުކޮށްފައިވާ ތަންތަނެވެ. އެތަންތަން އެފަރާތްތަކާ ޙަވާލުކޮށްފައިވަނީ ރަނގަޅަށް ބަލަހައްޓައި އެކަށީގެންވާ ޚިދުމަތެއް ދިނުމަށް ޝަރުޠުކޮށްފައެވެ.