ރާއްޖޭގެ ބައެއް ހިސާބުތަކަށް ކުރަމުންދާ ވިއްސާރައިގައި ލ.އަތޮޅުގެ ބައެއްރަށްށުގައި ފެންބޮޑުވެ ބޮޑެތި ގެއްލުންތަކެއް ވެއްޖެއެވެ.
ޕީއެސްއެމް ނިއުސްއަށް މަޢުލޫމާތުދެއްވަމުން ލ.އަތޮޅު ކައުންސިލްގެ ރައީސް އަބްދުﷲ ޝަރީފް ވިދާޅުވީ މިއަދު މެންދުރު އެކެއް ޖެހީންސުރެ ލ.އަތޮޅުގެ ބައެއް ރަށްރަށަށް ހުއްޓުމެންނެތި ބޯކޮށް ވާރޭވެހެމުންދާކަމަށެވެ. ފެންބޮޑުވުމުގެ ސަބަބުން އެމްއެންޑީއެފްއާއި މޯލްޑިވްސް ޕޮލިސްސަރިވިސް އަދި ޕަބްލިކް ވޯކަރުންނާ ގުޅިގެން ފެންހިންދުމުގެ މަސައްކަތް ކުރަމުންދެއެވެ. އަދި ގޭގެއަށް ފެން ނުވަންނާނެހެން ވެލިބަސްތާތައް ޖެހުމުގެ މަސައްކަތް މިހާރު ދަނީ ކުރަމުންނެވެ.
ފުލުހުން މަޢުލޫމާތުދެއްވާ ގޮތުގައި ލ.މާމެމްދޫއިން ވަނީ ކަރަންޓު ގޮސްފައެވެ. އަދި އެރަށުގެ އިންޖީނުގޭގެ އިންޖީނުތަކާ ހަމައަށް ފެންވަދެ އިންޖީނުތަކަށް ފެނުގެ އަސަރުވަނީ ކޮށްފައެވެ.
މާމެންދޫއިން އެކަނިވެސް ގާތްގަނޑަކަށް 200 ވަރަކަށް ގެއަށް ފެން ވަދެފައިވާކަމަށާ އެމުޅި ރަށުން ކަރަންޓު ކެނޑި ރަށުގެ ބޮޑުބައެއް ފެނު އަޑީގައި ވާކަމަށް ފުލުހުން މަޢުލޫމާތުދެއްވައެވެ. މީގެ އިތުރުން ކުނަހަންދޫއިން އެއްގެއަށް އަދި ހިތަދޫއިން 30 ގެއަކަށް ފެންވަދެ ގެއްލުންތަކެއް ވެފައިވާކަމަށް ފުލުހުން މަޢުލޫމާތުދެއެވެ. އަދި މާވަށުގެ 7 ގެއަކަށް ފެން ވަދެފައިވާއިރު، ކުނަހަންދޫ އިންޖީނުގެއަށް ފެން ވަނަނުދިނުމަށް ފުލުހުން ހަރަކާތްތެރި ވަމުންދާކަމަށްވެސް އެފަރާތުން މަޢުލުމާތުދެއްވައެވެ.
މީގެ އިތުރުން ގދ.ތިނަދޫގައި ފެންބޮޑުވެ 3 ގެއަކަށް ފެންވަދެފައިވާކަމަށާ، ފުލުހުންނާއި ސިފައިން ދަނީ ފެންހިންދުމުގެ މަސައްކަތްކުރަމުންކަށް ފުލުހުން މައުލޫމާތުދެއްވައެވެ. އަދި ތ.އަތޮޅު މަޑިފުށީގެ 10 ގެއަކަށް، ތ.ދިޔަމިގިލީ 15 ގެއަކަށް، އެއަތޮޅު ގުރައިދޫގައިވެސް ފެންބޮޑުވެފައިވާކަމަށް ފުލުހުން މަޢުލޫމާތުދެއްވައެވެ.