މިއަދު ހެނދުނުން ފެށިގެން ދެކުނުގެ އަތޮޅުތަކަށް ކުރަމުންދާ ވިއްސާރާގައި ބައެއް ރަށްރަށުގައި ފެންބޮޑުވެ ގޭގެއަށް ފެންވަދެ ބޮޑެތި ގެއްލުންތަކެއް ވަމުންދާތީ ރައްކާތެރިވުމަށް ސަމާލުވުމަށް ނެޝަނަލް ޑިޒާސްޓަރ މެނޭޖްމަންޓް އޮތޯރިޓީން އިލްތިމާސްކުރައްވައިފިއެވެ.
ބޯކޮށް ވާރޭ ވެހުމުގެ ސަބަބުން ލ.އަތޮޅުގެ ރަށްރަށުގެ ތެރެއިން ކުނަހަންދޫ، ގަން، ފޮނަދޫ، މާމެންދޫ، މާވަށް، ހިތަދޫ މިރަށްރަށަށް ބޯކޮށް ވާރޭވެހި ފެންބޮޑުވެ ބައެއް ރަށްރަށަށް ވަނީ ބޮޑެތި ގެއްލުންތަކެއް ވެފައެވެ. އަދި ބައެއް ރަށްރަށުގެ އިންޖީނުގެއަށް ފެނުގެ އަސަރުކޮށް މުޅިރަށުންވަނީ ކަރަންޓުކެނޑިފައެވެ. އަދި ބައެއް ރަށްތަށުގެ ގޭގެއަށް ފެންވަނުމުގެ ސަބަބުން ފަރުނީޗަރުތަކާއި ހިފާ ގެންގުޅޭ ތަކެއްޗަށް ގެއްލުންވެފައިވެއެވެ.
ލ.އަތޮޅުގެ އިތުރުން ގއ.އަތޮޅާއި ގދ.އަތޮޅާއި ތ.އަތޮޅުގެ ބައެއް ރަށްރަށުގައިވެސް ފެންބޮޑުވެ ގެއްލުންތަކެއް ވެފައިވެއެވެ. އަދި އައްޑޫސިޓީއަށްވެސް ބޯކޮށް ވާރޭވެހި މަގުތަކުގައި ފެންބޮޑުވެފައިވެއެވެ.
މިރޭ ބޭއްވި ނޫސްވެރިންގެ ބައއްދަލުވުމެއްގައި ނެޝަނަލް ޑިޒާސްޓަރ މެނޭޖްމަންޓް އޮތޯރިޓީގެ ޗީޕް އެގްޒެކެޓިވް އޮފިސަރ ހިސާން ހަސަން ވިދާޅުވީ ދެކުނުގެ އަތޮޅުތަކަށް މިހާރު ކުރަމުންދާ ވިއްސާރައިގައި ބައެއް ގޭގެއަށް ފެން ވަނުމުގެސަބަބުން އެކިވަރުގެ ގެއްލުންތައް ލިބިފައިވާކަމުގެ މަޢުލޫމާތު އެއޮތޯރިޓީއަށް ލިބިފައިވާކަމަށެވެ.
މޫސުން ގޯސްވެ ފެންބޮޑުވުންފަދަ ހާދިސާތައް ހިނގުމުގެ ކުރިން މިކަމަށް ދުރާލާ ސަމާލުވެ ތިބުމަށް ނޭޝަނަލް ޑިޒަސްޓަރ މެނޭޖްމަންޓް އޮތޯރިޓީން އިލްތިމާސްކުރައްވައެވެ. މިގޮތުން ގޭގެ ހިފާގެންގުޅޭ ތަކެއްޗަށް ގެއްލުންނުވާނެފަދަ ގޮތަކަށް ރައްކާތެރިކުރުމާއި ގޭގެއަށް ފެންނުވަންނާނެހެން ވެލިބަސްތަ ޖަހައި ސަލާމަތީ ފިޔަވަޅު އެޅުމަށް އެ އޮތޯރިޓީން އިލްތިމާސްކުރައްވައެވެ. އަދި ރައްޔިތުންނަށް ލިބެމުންދާ ގެއްލުންތައް އެއޮތޯރިޓީން ބަލަމުންދާކަމަށާ އެހީތެރިވަމުންދާނެކަމަށްވެސް ޙިސާން ވިދާޅުވިއެވެ.