މިއަހަރުގެ ފުރަތަމަ ކުއާޓަރގައި ރާއްޖޭގެ މަސް ކުންފުނިތަކުން މަސްވެރިންގެ އަތުން މަސް ގަނެފައިވާ އަދަދު އިތުރުވެއްޖެއެވެ.
މޯލްޑިވްސް މަނިޓަރީ އޮތޯރިޓީގެ ކުއާޓަރލީ އިކޮނޮމިކް ބުލެޓިންގ ރިޕޯޓުގައިވާ ގޮތުން، މަސް ކުންފުނިތަކުން މަސް ގަނެފައިވާ އަދަދު އިތުރުވެފައިވީ ނަމަވެސް އެ މުއްދަތުގައި ރާއްޖެއިން މަސް ބޭރުކުރި މިންވަރު ވަނީ ދަށަށް ގޮސްފައެވެ.
އެގޮތުން ހުސްވި އަހަރުގެ ފަހު ކުއާޓަރާ އަޅާ ބަލާއިރު، މިއަހަރުގެ ފުރަތަމަ ކުއާޓަރގައި ރާއްޖެއިން މަސް ބޭރުކުރި މިންވަރުވަނީ 4 އިންސައްތަ ދަށަށް ގޮސްފައެވެ. ތަފާސް ހިސާބުތައް ދައްކާގޮތުން މިއަހަރުގެ ފުރަތަމަ ކުއާޓަރގައި ރާއްޖެއިން އެކްސްޕޯޓުކޮށްފައިވަނީ ސޯޅަ ހާސް އަށްސަތޭކަ ހަތްދިހަ ތިން މެޓްރިކް ޓަނުގެ މަހެވެ.
ރާއްޖެއިން މަސް އެކްސްޕޯޓުކުރި މިންވަރު ދަށްވެފައިވަނީ އެ މުއްދަތުގައި ގަނޑުކުރި ކަޅުބިލަ މަހާއި، ތާޒާ އަދި ގަނޑުކުރި މަސް އެކްސްޕޯޓު ކޮށްފައިވާ އަދަދު ދަށްވުމުންނެވެ. ނަމަވެސް އެ މުއްދަތުގައި ތާޒާ އަދި ފިނިކުރި ރީނދޫ އުރަހަ ކަންނެލި ރާއްޖެއިން އެކްސްޕޯޓުކުރި މިންވަރުވަނީ އިތުރުވެފައެވެ.