ރާއްޖެ އިޝްތިހާރުކުރުމަށްޓަކައިި ޔޫރަޕްގައި ރޯޑް ޝޯވްއެއް ބޭއްވުމަށް އެމްއެމްޕީއަރުސީން ނިންމައިފިއެވެ.
މޯލްޑިވްސް މަރކެޓިންގ އެންޑް ޕަބްލިކް ރިލޭޝަންސް ކޯރޕަރޭޝަންސް، އެމްއެމްޕީއާރުސީން މިހާރުވަނީ އެ ކޯރޕަރޭޝަނާއި ގުޅިގެން އަންނަ ސެޕްޓެމްބަރުމަހު ޔޫރަޕްގެ 4 ޤައުމެއްގައި ރޯޑްޝޯވްތައް އިންތިޒާމްކުރަން ޝައުގުވެރިވާ ފަރާތެއް ހޯދުމަށް އިޢުލާންކޮށްފައެވެ.
މި ރޯޑްޝޯވްތައް ބޭއްވުމަށް ހަމަޖެހިފައިވަނީ ނޯވޭ، ޑެންމަރކް، ފިންލޭންޑް އަދި ސްވިޑަންގައެވެ.
އެމްއެމްޕީއާރުސީއިން ގެންދަނީ ރާއްޖެ އިޝްތިހާރުކުރުމަށްޓަކައި ދުނިޔޭގެ އެކި ހިސާބުތަކުގައި ބާއްވާ ފެއަރތަކުގައި ބައިވެރިވަމުންނެވެ. އަދި އެކި ހިސާބުތަކުގައި ރޯޑް ޝޯވްތައް ބާއްވާ ތަފާތު އެކި ކެމްޕެއިންތައްވެސް އެމްއެމްޕީއާރުސީން ދަނީ ބާއްވަމުންނެވެ.
މިއަހަރުގެ މަރކެޓިންގ ޕްލޭންގައިވާ ގޮތުން ރާއްޖެ އިޝްތިހާރުކުރުމަށް ހަމަޖެހިފައިވަނީ 22 މަރކެޓްއަކަށް ބަހާލައިގެންނެވެ.
އެގޮތުން އެޤައުމުތަކާއި ސަރަޙައްދުތަކުގައި ކުރިއަށްދާ 21 ފަތުރުވެރިކަމުގެ ފެއަރއެއްގައި ބައިވެރިވުމަށް ނިންމާފައިވާއިރު، 18 ރޯޑް ޝޯވްއެއް ކުރިއަށްގެންދިޔުމަށްވެސް ވަނީ ހަމަޖެހިފައެވެ. އަދި 22 ޤައުމަކުން ނޫސްވެރިންގެ ޓީމްތައް ރާއްޖެއަށް ގެނެސް ރާއްޖޭގެ ފަތުރުވެރިކަމާގުޅޭ މައުލޫމާތު ދިނުމަށްވެސް ވަނީ ޕްލޭންގައި ހިމަނާފައެވެ.