ފުޅާ ދާއިރާއެއްގައި ތަފާތު އެކި ވިޔަފާރިތަށް ކުރަމުންދާ އިނގިރޭސިވިލާތުގެ "ވަރޖިން" ކުންފުނިން އަލަށް ފަށާ ކުރޫޒް ލަައިންގެ ދަތުރުތަކުގެ ޚިދުމަތް އަންނަ އަހަރުތެރޭ ފެށުމަށް ތައްޔާރުވެއްޖެއެވެ.
ވަރޖިން ގުރޫޕްގެ ސަބްސިޑަރީ ކުންފުނި ވަރޖިން ވޮޔެޖަސްއިން ކުރޫސް ލައިންގެ ދަތުރުތަކުގެ ޙިދުމަތް ފެށުމަށްޓަކައި ބަދެފައިވާ ކުރޫސް ބޯޓުގައި މިހާރު ކުރެވެމުންދަނީ އެންމެ ފަހުގެ މަސައްކަތްތަކެވެ. ސްކާލެޓް ލޭޑީގެ ނަން ދީފައިވާ މި ކުރޫސް ލައިންގެ ފުރަތަމަ ދަތުރު އަންނަ އަހަރުކުރުމަށް ހަމަޖެހިފައިވާއިރު، މިހާރުވަނީ ބުކިންގއަށް ހުޅުވާލާފައެވެ.
އެގޮތުން މިހާރު ވަނީ ތިން އައިޓިނަރީއެއް ބުކިންއަށް ހުޅުވާލާފައެވެ. އެ ތިން މަންޒިލަކީ ހަވާނާއަށް ކުރާ ދަތުުރަކާއި، މާޔަން އައިލެންޑްސްއަށް ކުރާ ދަތުރަކާއި، ޑޮމެނިކަން ރިޕަބްލިކަށް ކުރާ ދަތުރެކެވެ. މިހުރިހައި ދަތުރެއްގައިވެސް ފަތުރުވެރިންގެ މެދުގައި މަޤްބޫލް މަންޒިލެއްކަމުގައިވާ ބަހަމަސްގައި މަޑުކުރާނެއެވެ. ވަރޖިން ގުރޫޕުން ހާމަކުރާގޮތުގައި ސްކާލެޓް ލޭޑީ ވެގެންދާނީ ކުރޫޒް ލައިންތަކުގެ ދަތުުރުތަށް އެހެން ހަރުފަތަކަށް ގެންދާނެފަދަ ކުރޫސްލައިނަކަށެވެ.
ޕެކޭޖްތަކަށް ދައްކާ ފައިސާގެ އިތުރުން އިތުރަށް އެއްވެސް ޗަރޖެއް ކުރޫޒްލައިންއިން ލިބެންހުރި ޙިދުމަތްކަށް ނުނަގާނެއެވެ. އެގޮތުން ސްޕާގެ ޙިދުމަތްތަކާއި، ފިޓްނަސް ކްލާސްތައް ޕެކޭޖްތަކުގައި ހިމެނެއެވެ. އަދި މީގެއިތުުރުން ހުރިހައި ފަސިންޖަރުންނަށް ހިލޭ ވައިފައިގެ ޙިދުމަތް ލިބޭނެއެވެ.
ދެހާސް ހަތްސަތޭކަ ހަތްދިހަ މީހުންގެ ޖާގައިގެ ސްކާލެޓް ލޭޑީގައި ސަތާރަ ޑެކް ހުރެއެވެ. އަދި ތަފާތު އެކި ކެޓަގަރީތަކުގެ ރޫމްތައް ހުރެއެވެ. އޭގެތެރެއިން އެންމެ ފާހަގަކޮށްލެވެނީ " މެގަ ރޮކްސްޓަރ ސުއިޓްސް" އެވެ. މިފަދަ ފަނަރަ ސުއިޓްސް ހުންނައިރު، މީގައި ބޮޑު ބެލްކަނީއެއް ހުރެއެވެ.
އަދި އާދައިގެ ކޮޓަރިތައްވެސް ފަސިންޖަރުންނަށް ލިބެން ހުރެއެވެ. މި ކޮޓަރިތަކަކީ ސްމާޓް ކޮޓަރިތަކެކެވެ. އަމިއްލައަށް އޭސީގެ ފިނި ހޫނު މިން އެޖެސްޓްކޮށް، ދުވަހުގެ ވަގުތަށް ބެލުމަށްފަހު ލައިޓްސްތައްވެސް އެޖެސްޓްކުރާނެއެވެ.
މި ކުރޫސްލައިންއަކީ ހަމައެކަނި އަށާރަ އަހަރުން މަތީގެ މީހުންނަށް ޙާއްސަ ކުރޫސްލައިންއެކެވެ. ޗުއްޓީ ހޭދަކޮށްލާ ފަރާތްތަކަށް އެންމެ އެކަށޭނަ ޙިދުމަތްތައް ސްކާލެޓް ލޭޑީއިން ލިބެން ހުންނާނެކަމަށް ވަރޖިން ވޮޔެޖަސްއިން ހާމަކުރުއެވެ. އެގޮތުން ތަފާތު އެކި މިއުޒިކް ޝޯވްތަކާއި އެކި ކަހަލަ ލައިވް ޝޯވްތައް ސްކާލެޓް ލޭޑީގައި ކުރިއަށްދާނެއެވެ.
އަދި ތިމާވެއްޓާއި އެންމެ ރަހުމަތްތެރިގޮތްތައް މި ކުރޫޒްލައިންގައި ޤާއިމްކުރުމަށްޓަކައި، އެއް ފަހަރު ބޭނުންކޮށްފައިވާ އުކާލާ ޕްލާސްޓިކް ސްކާލެޓް ކުރޫސްގައި ބޭނުން ނުކުރާނެ ކަމަށް ވަރޖިން ވޮޔެޖަރސް އިން ހާމަކުރެއެވެ.
އަންނަ އަހަރު ސްކާލެޓް ލޭޑީގެ ދަތުރުތައް ފެށުމަށް ހަމަޖެހިފައިވާއިރު، މިހާރުވެސް ގިނަ އަދަދެއްގެ ބަޔަކުދަނީ ބުކިންގްސްތައް ހަދަމުންކަމަށްވެސް ވަރޖިން ވޮޔެޖަރސްއިން ހާމަކުރެއެވެ.