އިނގިރޭސިވިލާތުގެ ލަންޑަންގައި ހުންނަ ދިވެހި އެމްބަސީގެ ފަރާތުން ރާއްޖޭގެ ފަތުުރުވެރިކަން އިޝްތިހާރުކުރުމަށްޓަކައި "ބެޑްފޯޑް އިޓަލިއަން ފެސްޓިވަލް"ގައި ބައިވެރިވެއްޖެއެވެ.
މި ފެސްޓިވަލްގައި ރާއްޖޭގެ ފަރާތުން އެންމެ އިސްކޮށް ހުންނެވީ ރާއްޖެއިން އިނގިރޭސިވިލާތަށް ކަނޑައަޅުއްވާފައި ހުންނަވާ ސަފީރު ޑރ. ފަރަޙަނާޒް ފައިސަލްއެވެ.
މިފެއަރއަށް ޒިޔާރަތްކުރި ފަރާތްތަކަށް ވަނީ ރާއްޖޭގެ ފަތުރުވެރިކަމާގުޅޭ މައުލޫމާތުދީފައެވެ. އެގޮތުން ރާއްޖޭގެ ރިސޯޓްތަކާއި، ގެސްޓް ހައުސްތައް، ލިވްއަބޯޑްތަކުގެ އިތުރުން ހޮޓެލްތަކާއި ގުޅޭ މައުލޫމާތު ވަނީ ހިއްސާކޮށްފައެވެ. ބެޑްފޯޑް އިޓާލިއަން ފެސްޓިވަލަކީ ތަފާތު ކެއުންތަކާއި، މިއުޒިކްގެ ހަރަކާތްތައް އަދި އިޓަލީގެ ކާރުތައް ދައްކާލުމާއެކު ކުރިއަށްދާ ފެސްޓިވަލްއެކެވެ.
މިއީ ބެޑްފޯޑްގައި ބާއްވާ އެންމެ މަޝްހޫރު އަދި އެންމެ ގިނަ އަދަދެއްގެ މީހުން ޒިޔާރަތްކުރާ ފެސްޓިވަލްއެވެ.
އިޓަލީ އަދި އިނގިރޭސިވިލާތަކީ ރާއްޖޭގެ ފަތުރުވެރިކަމަށް މުޙިއްމު ދެ މާކެޓެވެ. އެގޮތުން ޖޫންމަހުގެ ނިޔަލަށް ތަފާސް ހިސާބުތައް ދައްކާގޮތުން އިޓަލީން ރާއްޖެއަށް ޒިޔާރަތްކުރި ފަތުރުވެރިންގެ އަދަދުވަނީ 34 އިންސައްތަ އިތުރުވެފައެވެ. އަދި އިނގިރޭސިވިލާތުން ރާއްޖެއަށް ޒިޔާރަތްކުރި ފަތުރުވެރިންގެ އަދަދުވަނީ 13 އިންސައްތަ އިތުރުވެފައެވެ.