ދުނިޔޭގެ އެންމެ ގިނަބަޔަކު ދާން ބޭނުންވާ ޤައުމުތަކުގެ ލިސްޓުގެ ހަވަނަ ރާއްޖެއަށް ލިބިއްޖެއެވެ.
ޓްރެވަލް ވެބްސައިޓެއް ކަމަށްވާ ބިގް ސެވަނަ އިން އެކުލަވާލާފައިވާ 'ޓޮޕް 50 ބަކެޓް ލިސްޓް ޑެސްޓިކޭޝަންސް އިން ދަ ވަރލްޑް' ލިސްޓުގައި ޖުމްލަ 50 ޤައުމު ހިމެނެއެވެ. މި ލިސްޓު އެކުލަވާލާފައިވަނީ 1.5 މިލިއަން މީހުނާއި ސުވާލުކޮށް، އެމީހުން އެންމެ ދާން ބޭނުންވާ ޤައުމުތަކުގެ ލިސްޓުތަކުގެ މައްޗަށް ބިނާކޮށެވެ.
މި ލިސްޓުގެ އެއްވަނަ ހޯދާފައިވަނީ އޭޝިއާ ސަރަޙައްދުގައިވެސް ރާއްޖޭގެ ފަތުރުވެރިކަމާއި ވާދަވެރި މަންޒިލެއް ކަމަށްވާ އިންޑޮނޭޝިއާގެ ބާލީއެވެ. ދެވަނަ އަށް އެމެރިކާގެ ނިއު އޯލަންސްއެވެ. އަދި ތިންވަނަ އަށް ހޮވިފައިވަނީ އަޔަރލޭންޑުގެ ކެރީއެވެ.
މި ލިސްޓުގެ ހަވަނަ ރާއްޖެއަށް ލިބިފައިވާއިރު، ފަސްވަނަ އަށް އައިސްފައިވަނީ އޮސްޓްރޭލިއާގެ ސިޑްނީއެވެ.
ބިގް ސެވަންއިން ހާމަކުރާގޮތުގައި އާއްމުގޮތެއްގައި މީހުންދާން ބޭނުންވަނީ ގުދުރަތީގޮތުން ރީތި ހިތްގައިމު މަންޒިލްތަކަށެވެ. އަދި ދުނިޔޭގެ މަޝްރޫހު ބިނާތައް ހުންނަ މަންޒިލްތަކަށް ދާން ބޭނުންވާ މީހުންވެސް ގިނަކަން މި ސަވޭއިން ފާހަގަވިކަމަށް ބިގް ސެވަންއިން ހާމަކުރެއެވެ.
އަދި އާއްމުގޮތެއްގައި ކޮންމެ މީހެއްގެ ލިސްޓުގައިވެސް 11 ޤައުމެއް ހިމެނޭ ކަމަށާއި އޭގެ ތެރެއިން 7 ޤައުމަކަށް ހަޔާތުގެ ކޮންމެވެސް ހިސާބެއްގައި ދެވޭނެ ކަމަށް ޢުއްމީދުކުރެއެވެ.
ފަތުރުވެރިކަމުގެ ބުރޭންޑަކަށް ރާއްޖެވެފައިވާއިރު، ބޭރުގެ އެކި ފަރާތްތަކުން ތައްޔާރުކުރާ މިފަދަ ލިސްޓުތަކުގައި ދިވެހިރާއްޖެ އަދި ރާއްޖޭގެ ރިސޯޓުތައް އާއްމުގޮތެއްގައިވެސް ހިމެނެއެވެ. ރާއްޖެއަށް އޮންނަ މަޤްބޫލްކަން އިތުރުކޮށް ބޭރުގެ އެކި ކަންކޮޅުތަކުގައި ރާއްޖެ އިޝްތިހާރުކުރުމަށް ފަތުރުވެރިކަމުގެ ސިނާއަތުގައި ހަރަކާތްތެރިވާ ފަރާތްތަކުންވެސް ގިނަ މަސައްކަތްތަކެއް ކުރާކަން ފާހަގަކޮށްލެވެއެވެ.