މި އަހަރުގެ ދެވަނަ ކުއާޓަރުގައި އެމްޓީސީސީއަށް 14 މިލިއަން ރުފިޔާގެ ގެއްލުމެއް ވެއްޖެއެވެ.
އެމްޓީސީސީން އާއްމުކޮށްފައިވާ އެކުންފުނީގެ މިއަަހަރުގެ ދެވަނަ ކުއާޓަރުގެ މާލީހިސާބުތައް ދައްކާގޮތުން އެ ކުއާޓަރުގައި ކުރި ވިޔަފާރީގެ ޖުމްލަ އަގު އުޅެނީ 266 މިލިއަން ރުފިޔާގައެވެ.
ވިޔަފާރިކުރުމަށް 240 މިލިއަން ރުފިޔާ ހަރަދުކޮށްފައިވާއިރު، ކުންފުނި ހިންގައިގެންވަނީ 1.8 މިލިއަން ރުފިޔާގެ ގެއްލުމެއްވެފައެވެ.
އެމްޓީސީސީއަށް މިއަހަރުގެ ފުރަތަމަ ކުއާޓަރުގައިވެސް ވަނީ، 45 މިލިއަން ރުފިޔާގެ ގެއްލުމެއްވެފައެވެ. އެކުންފުނިން އޭރު ބުނެފައިވަނީ މާލީގޮތުން ގެއްލުންތައްވަމުންދަނީ ކުންފުނިން ކުރިއަށްގެންދާ މަޝްރޫޢުތައް ހުއްޓިފައި ހުރުމުން ކަމަށެވެ.
އެގޮތުން ރިޔާސީ އިންތިހާބަށްފަހު އައު ސަރުކާރު އައުމާއި ހަމައަށް މަޝްރޫއުތައް ހުއްޓިފައި ހުރިކަމަށެވެ.
ނަމަވެސް މިހާރު ބައެއް މަޝްރޫއުތައް ފަށައި، އެމްޓީސީސީއަށް މާލީ ފައިދާތައް ހޯދުމަށް ސަރުކާރާއި ގުޅިގެން މަސައްކަތް ކުރަމުންދާ ކަމަށް ކުންފުނިން އޭރު ބުނެފައިވެއެވެ.
މިދިޔައަހަރު އެމްޓީސީސީއަށް ލިބިފައިވާ ފައިދާގެ އަދަދު ދަށްވުމާއި ގުޅިގެން، މިއަހަރުގެ މާލީ ހާލަަތަށް ރިޔާއަތްކޮށް ނިމިދިޔަ އަހަރުގެ ޙިއްޞާ ފައިދާ އެކުންފުނިން ބަހާފައެއް ނުވެއެވެ.