މިއަހަރުގެ ދެވަނަ ކުއާޓަރުގައި އެމްޓީޑީސީއަށް ސާފު ފައިދާގެ ގޮތުގައި 6.3 މިލިއަން ރުފިޔާ ލިބިއްޖެއެވެ.
މޯލްޑިވްސް ޓޫރިޒަމް ޑިވެލޮޕްމަންޓް ކޯޕަރޭޝަން، އެމްޓީޑީސީން އާއްމުކޮށްފައިވާ އެކުންފުނީގެ މިއަހަރުގެ ދެވަނަ ކުއާޓަރުގެ މާލީ ހިސާބުތައް ދައްކާގޮތުން އެ ކުއާޓަރގައި އެމްޓީޑީސީއަށް އާމްދަނީގެ ގޮތުގައި 1.1 މިލިއަން ޑޮލަރު ނުވަތަ ސަތާރަ މިލިއަން ރުފިޔާ ވަނީ ލިބިފައެވެ.
ޓެކްސްއަށް ކެނޑުމުގެ ކުރިން 7.3 މިލިއަން ރުފިޔާގެ ފައިދާއެއްވެފައިވާ އިރު، ޓެކްސްއަށް ކެނޑުމަށްފަހު ސާފު ފައިދާގެ ގޮތުގައި އެމްޓީޑީސީއަށް ލިބިފައިވަނީ 6.3 މިލިއަން ރުފިޔާއެވެ.
އެމްޓީޑީސީއަށް މިއަހަރުގެ ފުރަތަމަ ކުއާޓަރގައިވެސް އާމްދަނީގެ ގޮތުގައި ލިބިފައިވަނީ ސަތާރަ މިލިއަން ރުފިޔާއެވެ. އަދި ސާފު ފައިދާގެ ގޮތުގައި އެ ކުއާޓަރގައި ލިބިފައިވަނީ ފަހެއް ޕޮއިންޓް ހަތެއް މިލިއަން ރުފިޔާއެވެ.
ދެވަނަ ކުއާޓަރގައި ލިބުނު ފައިދާގެ މިންވަރު އިތުރުވެފައިވަނީ ކުންފުނީގެ އިދާރީ ޙަރަދުތައް ކުޑަކުރުމާއި ގުޅިގެންނެވެ. އެގޮތުން އަހަރުގެ ފުރަތަމަ ކުއާޓަރގައި އިދާރީ ޙަރަދުތަކަށް 3.3 މިލިއަން ރުފިޔާ ޙަރަދުކޮށްފައިވާއިރު، ދެވަނަ ކުއާޓަރގައިވަނީ އިދާރީ ޙަރަދުތައް 2.7 މިލިއަން ރުފިޔާއަށް ކުޑަކޮށްފައެވެ.
އެމްޓީޑީސީއަކީ ފަތުރުވެރިކަމުގެ މަންފާ ދިވެހި ރައްޔިތުންނަށް ސީދާގޮތެއްގައި ހޯދައިދިނުމަށް ސަރުކާރުން 2006 ވަނަ އަހަރު އުފެއްދެވި ކުންފުންޏެކެވެ.