މިއަހަރު ރާއްޖެއިން ޙައްޖަށް މީހުން ގެންދިޔުމަށް ލިބުނު 2000 ކޯޓާގައި މީހުން ޙައްޖަށް ގޮސްފައިވާކަމަށް އިސްލާމިކް މިނިސްޓަރ ޑރ.އަޙްމަދު ޒާހިރު ވިދާޅުވެއްޖެއެވެ.
މިއަހަރަކީ ރާއްޖެއިން އެންމެ ގިނައިން މީހުން ޙާއްޖަށްދާ ފަހަރުކަމަށް އިސްލާމިކް މިނިސްޓްރީން ވިދާޅުވެއެވެ. މިއަހަރުގެ އަމީރުލް ޙައްޖު، ޕްލޭނިން މިނިސްޓަރ އަޙްމަދު އަސްލަމް ފުރުވުމަށް އެއަރޕޯޓަށް ވަޑައިގެން ޕީއެސްއެމް ނިއުސްއަށް މަޢުލޫމާތު ދެއްވަމުން އިސްލާމިކް މިނިސްޓަރ ޑރ. އިބްރާޙިމް ޒާހިރު ވިދާލުވީ މިއަހަރު ރާއްޖެއަށް ލިބުނު ހުރިހާ ކޯޓާގައި މީހުން ހައްޖަށް ގޮސްފައިވާކަމަށާއި އެފަރާތްތަކުގެ ހާލަތު ބެއްލެވުމަށް މިނިސްޓްރީގެ ޓީމް ހަރަކާތްތެރިވަމުންދާކަމަށެވެ. އެގޮތުން ޙައްޖުވެރިންނަށް ދިމާވާ ދަތިތަކާއި ބޭނުންވާ ކަންކަން ބަލައި އެކަންކަން ފުރިހަމަ ކޮށްދެއްވަމުންދާކަން މިނިސްޓަރ ފާހަގަކުރެއްވިއެވެ.
މިއަހަރުގެ އަމީރުލްޙައްޖުގެ ގޮތުގައި ވަޑައިގެންފައިވަނީ މިނިސްޓަރ އޮފް ނެޝަނަލް ޕްލޭނިންގ އެންޑް އިންފްރާސްޓްރަކްޗަރ، މުޙައްމަދު އަސްލަމްއެވެ. މިނިސްޓަރ އަސްލަމް މިހާރު ވަނީ ޙައްޖުގެ މަތިވެރި އަޅުކަން އަދާކުރުމަށް ފުރާވަޑައިގެންފައެވެ.
ކޮންމެ އަހަރަކުވެސް ދިވެހި ޙައްޖުވެރިންގެ ކަންކަމާ ޙަވާލުވެވަޑައިގަންނަވާނެ ދައުލަތުގެ އިސް މަސްއޫލުވެރިޔަކު ނުވަތަ އަމީރުލްޙައްޖުގެ ގޮތުގައި ދާނެ ފަރާތެއް ރައީސުލްޖުމްހޫރިއްޔާ ކަނޑައަޅުއްވައެވެ. މިއހަރު ރާއްޖެއިން ޙައްޖަށް ދިއުމަށް މީހުން ފުރަން ފަށާފައިވަނީ މިދިޔަ މަހުގެ 21 ވަނަ ދުވަހުއެވެ. އަދި ރާއްޖެއިން ޙައްޖަށްދާ އެންމެ ފަހު ޤުރޫޕުގެ މީހުން މިހާރު ވަނީ ފުރާފައެވެ. މިއަހަރު ރާއްޖެއިން މީހުން ހައްޖަށް ގެންދިޔުމަށްޓަކައި ޙައްޖު ކޯޕަރޭޝަނާއެކު 6 ކުންފުންޏަކަށް ވަނީ ހުއްދަ ދީފައެވެ.