ރާއްޖޭގެ ފަތުރުވެރިކަމުގެ ސިނާއަތް އިތުރަށް ކުރިއެރުވުމަށް ކަލްޗަރަލް ޓޫރިޒަމް މުހިއްމުކަމަށް ޓޫރިޒަމް މިނިސްޓަރ އަލީ ވަޙީދު ވިދާޅުވެއްޖެއެވެ.
ޓޫރިޒަމް މިނިސްޓަރ މިހެން ވިދާޅުވީ މިއަދުން ފެށިގެން އަންނަ ބުދަ ދުވަހުގެ ނިޔަލަށް މެލޭޝިއާގައި ކުރިއަށްދާ "ވޯލްޑް ޓޫރިޒަމް ކޮންފަރެންސް"ގެ ބައިވެރިންނާއި ވާހަކަފުޅުދައްކަވަމުންވެ.
މި ކޮންފަރެންސްގެ ފުރަތަމަ ސެޝަންގައި "ފިއުޗަރ އޮފް ޓޫރިޒަމް ނިއު ސޯސަސް އޮފް ގްރޯތް" މި މައުޞޫއަށް ޓުއަރިޒަމް މިނިސްޓަރ އަލީ ވަހީދު ވަނީ ރާއްޖޭގެ ފަތުރުވެރިކުގެ ކުރިމަގު އައު މިސްރާބަކަށް ގެންދިއުމަށްޓަކައި ކުރައްވާ ތަސައްވުރާއި މިކަން ހާސިލްކުރެވޭނެ ގޮތްތަކާއި ގުޅޭގޮތުން ވާހަކަފުޅުދައްކަވާފައެވެ. އެގޮތުން ރާއްޖޭގައި ކަލްޗުރަލް ޓޫރިޒަމް ތަރައްޤީކޮށް ފަތުރުވެރިންނަށް ތަފާތު ތަޖުރިބާތައް ކުރުމުގެ މަގު ފަހިވެގެންދާނެ ކަމަށް މިނިސްޓަރ ވިދާޅުވިއެވެ.
5ވަނަ "ވޯލްޑް ޓޫރިޒަމް ކޮންފަރެންސް"ގައި ޓުއަރިޒަމް މިނިސްޓަރ ބައިވެރިވެވަޑައިގަންނަވަނީ ދުނިޔޭގެ ފަތުރުވެރިކަމާއިބެހޭ ޖަމިއްޔާ ޔޫ.އެން.ޑަބްލިއު.ޓީ.އޯ އިން ދެއްވި ދައުވަތެއްގައެވެ.
މިއަހަރުގެ ކޮންފަރެންސްގެ ޝިޢާރަކީ ބިޔޯންޑް ޓުއަރިޒަމް – ބިޔޯންޑް އެކްސްޕެކްޓޭޝަންސްއެވެ. މި ކޮންފަރެންސް ރަސްމީކޮށް ފަށްޓަވައިދެއްވީ މެލޭޝިޔާގެ ބޮޑުވަޒީރު ޑރ. މަހާތިރު މުޙައްމަދެވެ.
ޓުއަރިޒަމް މިނިސްޓަރ މެލޭޝިޔާއަށް ކުރައްވާ ދަތުރުފުޅުގައި ދިވެހީރާއްޖޭގެ ފަތުރުވެރިކަމުގެ ސިނާޢަތް ކުރިއެރުވުމަށް މެލޭޝިޔާގެ ފަތުރުވެރިކަމާބެހޭ ވަޒީރު މުޙައްމައްދީން ކެޓާޕީއާއެކު މިނިސްޓަރ އަލީ ވަޙީދު މަޝްވަރާކުރެއްވުމަށްވަނީ ހަމަޖެހިފައެވެ.
މިނިސްޓަރގެ ދަތުރުފުޅުޅައި، މެލޭޝިއާގެ ލިމްކޮކްވިންގ ޔުނިވާސިޓީގެ ދަޢުވަތަކަށް، އެޔުނިވާސިޓީގެ ރައީސްއާއި ބައްދަލުކުރެއްވުމަށްވެސް ވަނީ ހަމަޖެހިފައެވެ. މިބައްދަލުވުމުގައި މިނިސްޓްރީއާއި، ފަތުރުވެރިކަމުގެ ސިނާޢަތުގެ އިންސާނީ ވަސީލަތް ތަރައްޤީކުރުމަށްޓަކައި ލީމްކޮކްވިންގ ޔުނިވާސިޓީއިން ފުރުޞަތު ފަހިކުރުމާއި ގުޅޭގޮތުން މަޝްވަރާކުރެއްވުމަށް ހަމަޖެހިފައިވާކަމަށް ޓޫރިޒަމް މިނިސްޓްރީން މައުލޫމާތުދެއެވެ.