އެންވަޔަރަމަންޓަލް އިމްޕެކްޓް އެސެސްމަންޓް އީ.އައި.އޭ ހެދުމެށް ނެތި ފަސް ރަށެއްގައި އިންޖީނުގެ އެޅުމުގެ މަސައްކަތް ފަށާފައިވަނީ ކުރީގެ މެނޭޖުމަންޓުންކަމަށާއި އެކަމުގައި ޒިންމާ ނަގަންޖެހޭ ފަރާތްތައް ޒިންމާ ކުރުވާނެކަމަށް ފެނަކަ ކޯޕަރޭޝަނުން ވިދާޅުވެއްޖެއެވެ.
އީއައިއޭ ނުހަދައި 5 ރަށެއްގެ އިންޖީނުގޭގެ މަސައްކަތް ފަށާފައިވާތީ އީޕީއޭއިންވަނީ ފެނަކަ ކުންފުނި ހަ ލައްކަ ރުފިޔާ އިން ޖޫރިމަނާ ކޮށްފައެވެ. އަދި 30 ދުވަހުގެ ތެރޭގައި އެ ފައިސާ ދައްކަން ވެސް ވަނީ އަންގާފައެވެ.
ފެނަކައިން ނެރުނު ނޫސް ބަޔާނެއްގައި ވަނީ އީއައިއޭ ނުހަދައި އެ 5 ރަށުގައި އިންޖީނުގެ ހެދުމުގެ މަސައްކަތް ފެށީ ކުރީގެ ސަރުކާރުން 2017ވަނަ އަހަރުގަ ކަމަށެވެ. މި ސަރުކާރު އައިސް މިހާރުގެ މެނޭޖްމަންޓާ ކުންފުނި ހަވާލުވި ފަހުން، އެރަށްތަކުގެ މައްސަލަ އީޕީއޭގެ ސަމާލުކަމަށް ގެނެސް، އެކަންކަން ރަނގަޅު ކުރުމުގެ މަސައްކަތް ފެށީ ފެނަކައިގެ އިސް ނެގުމަށް ކަމަށްވެސް އެކޯޕަރޭޝަނުން ވިދާޅުވެފައިވެއެވެ.
އަދި ކޮންމެ ހާލެއްގައި ވެސް ރައްޔިތުންނަށް ފޯރުކޮށްދޭ ޚިދުމަތްތައް އުނިކަމެއް އަދި ލަސްކަމެއް އަޔަނުދީ ކުރިއަށް ގެންދާނެކަމަށާ، އަޅަން ޖެހޭ ފިޔަވަޅުތައް އަޅަމުންދާކަމުގެ ޔަގީންކަން ދޭކަމަށް އެ ކުންފުނިން ވިދާޅުވެއެވެ.
ތިމާވެއްޓަށް ކުރާނެ އަސަރު ދެނެގަންނަން ހަދާ އެސެސްމަންޓު (އީއައިއޭ) ނުހަދައި އިންޖީނު ބެހެއްޓުމުގެ މަސައްކަތް ކުރަންފަށާފައިވަނީ ހއ.ތަކަންދު އާއި ހދ.ފިނޭ އާއި ނ.ހެނބަދު އާއި ނ.މާޅެންދޫ އަދި ބ.ކެންދޫގައެވެ.