މުދައްރިސުންގެ މުސާރައިގެ އޮނިގަނޑަށް ގެންނަން ބޭނުންވާ ބަދަލު، ޕޭ ކޮމިޝަނަށް ހުށައަޅައިފިއެވެ.
ރައްޔިތުންގެ މަޖިލީހުގެ ޤައުމީ ތަރައްޤީއާއި ތަރިކައިގެ ކޮމިޓީގައި ވާހަފުޅުކަދައްކަވަމުން އެޑިއުކޭޝަން މިނިސްޓަރ ޑރ.ޢާއިޝަތު ޢަލީ ވިދާޅުވީ މުދައްރިސުންނަށް އެކަށީގެންވާ އުޖޫރައެއް ހޯދައިދިނުމަށް ރައީސުލް ޖުމްހޫރިއްޔާ މަސައްކަތް ކުރައްވަމުން ގެންދަވާކަމަށެވެ.
މުދައްރިސުންގެ މުސާރައިގެ އޮނިގަނޑަށް ގެންނަ ބަދަލާއެކު ތަޢުލީމީ ދާއިރާގައި މަސައްކަތްކުރާ ސިވިލް ސަރިވިސް މުވައްޒަފުންގެ މުސާރައަށްވެސް ހެޔޮބަދަލެއް އަންނާނެކަމަށް މިނިސްޓަރ ވިދާޅުވިއެވެ. އެހެންނަމަވެސް މުދައްރިސުންގެ މުސާރައިގެ އޮނިގަނޑަށް ބަދަލު އަންނާނެ ތާރީޚެއް މިނިސްޓަރ ވިދާޅެއްނުވެއެވެ.
ޓީޗަރުންނަށް ދޭންޖެހޭ އުޖޫރައާއި ޢިނާޔަތްތައް އެންމެ ފުރިހަމައަށް ނުދެވޭކަމަށާއި ޓީޗަރުންކުރާ ބުރަ މަސައްކަތުގެ އަގު އަދާ ނުކުރެވޭކަމަށް އެޑިއުކޭޝަން މިނިސްޓަރ ވަނީ ވިދާޅުވެފައެވެ.