މާލެ ޖަލުގައި މަސައްކަތްކުރާ އޮފިސަރަކު ކޯވިޑް-19އަށް ޕޮޒިޓިވްވުމާއި ގުޅިގެން ނެގި ހުރިހާ ސާމްޕަލެއް ނެގެޓިވްވެއްޖެއެވެ.
މާލޭ ޖަލުގެ އޮފިސަރެއް ކޮވިޑަށް ޕޮޒިޓިވްވުމުން އެ ޖަލުން 101 މީހެއްގެ ސާމްޕަލް ނަގާފައިވެއެވެ.
މިމަހުގެ 21 ވަނަދުވަހު ނެގި ސާމްޕަލްތައް ނެގެޓިވްވިކަން އުފާވެރި ހަބަރެއްގެ ގޮތުގައި ހާމަކުރައްވާފައިވަނީ ކޮމިޝަނަރ އޮފް ޕްރިޒަންސް އަހުމަދު މުހައްމަދުފުޅުއެވެ.
މޯލްޑިވްސް ކަރެކްޝަނަލް ސަރވިސް ވަނީ މާލޭ ޖަލުގެ އީއެސްޖީ އޮފިސަރެއް ކޯވިޑް-19 އަށް ޕޮޒިޓިވްވުމުން ޖަލުގެ އޮފިސަރުންނާއި މުވައްޒަފުންގެ ތެރެއިން 70 މީހަކާއި، މާލޭ ޖަލުގެ 24 ޤައިދީއަކާއި، 7 ވެއިޓަރެއްގެ ސާމްޕަލް ނަގާފައިވާކަމަށެވެ.
ކޯވިޑް-19 އިން ރައްކާތެރިވުމުގެ ގޮތުން އެބަލި ޖަލުތަކުގައި އުޅޭތޯ ދެނެގަތުމަށްޓަކައި މީގެ ކުރިން ވަނީ ކަރެކްޝަނަލް ސަރވިސުން ބަލަހައްޓާ ހުރިހާ ޖަލުތަކާއި، ޖަލު އޮފިސަރުންނާއި، މުވައްޒަފުންގެ ސާމްޕަލްތައް ނަގައި ބަައްޔަށް ޓެސްޓުކޮށްފައެވެ. އެގޮތުން މާލެ ޖަލާއި ހުޅުމާލެ ޖަލުގެ އިތުރުން މާފުށީ ޖަލާއި، އައްސޭރިޖަލުން އޭރުނެގި ހުރިހާ ސާމްޕަލެއް ވަނީ ނެގެޓިވްވެފައެވެ.