ފެނަކައިގެ ބްރާންޗްތަކުން ޚިދުމަތުގެ އަގުގެ ގޮތުގައި ލިބެންޖެހޭ ގިނަ ޢަދަދެއްގެ ފައިސާ ނުލިބި ހުރުމުން، އެ ފައިސާ ހޯދުމަށް "ކަލެކްޝަން ޑޭ”ގެ ނަމުގައި ޙަރަކާތެއް ކުރިއަށް ގެންގޮސްފިއެވެ.
ފެނަކައިން ބުނީ މި ހަރަކާތަކީ އަތޮޅުތެރޭގެ ރަށްތަކުގައި ދެމުންދާ ޚިދުމަތްތައް ބޭނުންކޮށް، ޚިދުމަތުގެ އަގުގެ ގޮތުގައި ކުންފުންޏަށް ލިބެންޖެހޭ ގިނަ ޢަދަދެއްގެ ފައިސާ ނުލިބި ހުރުމުން ފެނަކައިގެ ހުރިހާ ބްރާންޗެއް ހިމެނޭ ގޮތަށް ކުރިއަށްގެންދިޔަ ހަރަކާތެކެވެ.
މި ހަރަކާތުގެ ތެރެއިން ކޯވިޑް-19 އާ ގުޅިގެން މިހާތަނަށް ކުރަންޓް ބިލުތަކަށް ފައިސާ ނުދައްކާ ހުރިހާ ފަރާތްތަކަކާއި ސަރުކާރުގެ އެކި މުއައްސަސާ، ކުންފުނިފަދަ ފަރާތްތަކާއި ބައްދަލުކޮށް، ފައިސާ ނުދެއްކި ހުރި ސަބަބުތައް އޮޅުންފިލުވާފައިވެއެވެ.
ފެނަކައިން ބުނީ ލުއިފަސޭހަ ގޮތަކަށް ވީ އެންމެ އަވަހަކަށް ފައިސާ ދެއްކުމަށް މަގުފަހިވާނެ ގޮތެއް ހޯދުމާއި ގުޅޭގޮތުން އެފަރާތްތަކާއެކު މަޝްވަރާކޮށްފައިވާކަމަށެވެ. އަދި މި ހަރަކާތުގައި ކުންފުނިން ދާދިފަހުން ތަޢާރަފް ކޮށްފައިވާ "ބިލް-ޕޭ އެޕްލިކޭޝަން" މެދުވެރިކޮށް އޮންލައިންކޮށް ފައިސާ ދެއްކޭނެ ނިޒާމަށް ކަސްޓަމަރުން އަހުލުވެރިކޮށް، ބިލް.ޕޭ އެޕް ބޭނުންކުރާނެގޮތް ކިޔަދީފައިވާކަމަށްވެސް ފެނަކައިން ބުނެއެވެ.
ކުންފުންޏަށް ލިބެންޖެހޭ ފައިސާ ލިބެންދެން ކުރިއަށް އޮތް ދުވަސްތަކުގައިވެސް އެކި ބްރާންޗްތަކުން މި ޙަރަކާތް ކުރިއަށް ގެންދާނެކަމަށް ފެނަކަ ކޯރޕަރޭޝަނުން ހާމަކުރެއެވެ.