އިންޑިއާގެ ފަތުރުވެރިކަމުގެ މާކެޓަށް އަމާޒުކޮށްގެން ހާއްސަ ވެބިނަރއެއް ބާއްވައިފިއެވެ.
މިއީ ކޯވިޑް19 އަށްފަހު ރާއްޖޭގެ ފަތުރުވެރިކަން އިންޑިއާގައި ޕްރޮމޯޓްކުރުމަށް ބޭއްވި ފުރަތަމަ ވެބިނަރއެވެ.
މި ވެބިނަރ ބާއްވާފައިވަނީ އިންޑިއާގައި ހުންނަ ރާއްޖޭގެ ހައިކޮމިޝަނުން އިސްނަގައިގެންނެވެ. މި ވެބިނަރގައި ޓްރިވެންޑްރަމްގައި ހުންނަ ރާއްޖޭގެ ކޮންސިއުލޭޓާއި، ފޮރިން މިނިސްޓްރީއާއި، ޓޫރިޒަމް މިނިސްޓްރީއާއި، އެމްއެމްޕީއާރުސީގެ އިތުރުން އެޗްޕީއޭއިން ވަނީ ބައިވެރިވެފައެވެ.
މި ވެބިނަރ ބޭއްވުމުގެ އެންމެ ބޮޑު ބޭނުމަކީ މިމަހުގެ 15 ވަނަ ދުވަހު ރާއްޖޭގެ ބޯޑަރު އަލުން ހުޅުވާލުމާއިއެކު ފަތުރުވެރިންގެ ސަލާމަތާއި ރައްކާތެރިކަމަށް ރާއްޖެއިން އަޅާފައިވާ ފިޔަވަޅުތައް އިންޑިއާގެ ފަތުރުވެރިކަމުގެ މާކެޓަށް އަންގައިދިނުމެވެ. މީގެތެރޭގައި ރިސޯޓްތަކާއި، އެއަރޕޯޓްގައި އަޅާފައިވާ ސަލާމަތީ ފިޔަވަޅުތައް ހިމެނެއެވެ. މި ވެބިނަރގެ ތެރެއިން އެމްއެމްޕީއާރުސީއާއި، އެމްއޭސީއެލްއާއި، ޓޫރިޒަމް މިނިސްޓްރީގެ އިތުރުން އެޗްޕީއޭއިން ވަނީ ޕްރެޒެންޓޭޝަން ހުށަހަޅައި، މައުލޫމާތު ދީފައެވެ. އަދި ވެބިނަރގެ ބައިވެރިންގެ ސުވާލުތަކަށް ޖަވާބުވެސް ވަނީ ދެއްވާފައެވެ.
އިންޑިއާގެ ފަތުރުވެރިކަމުގެ މާކެޓަށް އަމާޒުކޮށްގެން ބޭއްވި ފުރަތަމަ ވެބިނަރގައި އިންޑިއާގެ އައުޓްބައުންޑް ޓުއަރ އޮޕަރޭޓަރުންނާއި، ނޫސްވެރިން ހިމެނޭގޮތުން 181 ފަރާތެއް ވަނީ ބައިވެރިވެފައެވެ. ވެބިނަރގައި ބައިވެރިވި ބައެއް ފަރާތްތަކުން ވަނީ އިންޑިއާ ފަތުރުވެރިންގެ މެދުގައި ރާއްޖެއަކީ މަޤްބޫލު މަންޒިލެއްކަން ފާހަގަކުރައްވާފައެވެ.
ރާއްޖެއަށް ޒިޔާރަތްކުރާ ފަތުރުވެރިންގެ ތަފާސް ހިސާބުތަކަށް ބަލާއިރުވެސް އިންޑިއާ ފަތުރުވެރިންގެ މެދުގައި ރާއްޖޭގެ މަޤްބޫލުކަން ހާމަވެގެންދެއެވެ. މިދިޔަ އަހަރުގެ ރާއްޖެއަށް ދެވަނައަށް އެންމެ ގިނައިން ފަތުރުވެރިން ޒިޔާރަތްކޮށްފައިވަނީ އިންޑިއާއިންނެވެ.