މިއަހަރުގެ ޖުލައިމަހު ރާއްޖެއަށް ޒިޔާރަތްކޮށްފައިވަނީ 1769 ފަތުރުވެރިންކަމަށް މޯލްޑިވްސް އިމިގްރޭޝަނުން ހާމަކޮށްފިއެވެ.
ކޯވިޑް19އާ ގުޅިގެން ރާއްޖޭގެ ބޯޑަރު ބަންދުކޮށްފައި އޮތުމަށްފަހު އަލުން ހުޅުވީ ޖުލައިމަހުގެ 15 ވަނަ ދުވަހުއެވެ.
މޯލްޑިވްސް އިމިޤްރޭޝަނުން އާއްމުކޮށްފައިވާ ތަފާސް ހިސާބުތައް ދައްކާގޮތުން ޖުލައިމަހުގެ 15 ވަނަ ދުވަހުން 31 ވަނަ ދުވަހުގެ ނިޔަލަށް ރާއްޖެއަށް އައިސްފައިވަނީ 1769 ފަތުރުވެރިންނެވެ.
މި މުއްދަތުގެ ތެރޭގައި ރާއްޖެއަށް އެންމެ ގިނައިން ފަތުރުވެރިން ޒިޔާރަތްކޮށްފައިވަނީ އިނގިރޭސިވިލާތުންނެވެ. އެއީ 258 ފަތުރުވެރިންނެވެ.
ފަތުރުވެރިން ޒިޔާރަތްކުރި ޤައުމުތައް
- އެމެރިކާއިން 189 ފަތުރުވެރިން
- ޔޫއޭއީ އިން 143 ފަތުރުވެރިން
- ޖަރުމަނުވިލާތުން 135 ފަތުރުވެރިން
- ސްވިޓްޒަލޭންޑުން 79 ފަތުރުވެރިން
- ސްޕެއިންއިން 62 ފަތުރުވެރިން
- ފްރާންސްއިން 58 ފަތުރުވެރިން
- ރަޝިޔާ 58
- އިޓަލީއިން 44
- ފިލިޕީންސްއިން 43
- އެހެނިހެން ޤައުމުތަކުން 700 ފަތުރުވެރިން
ޖުލައިމަހު އެއްދުވަހަކު އެންމެ ގިނަ ފަތުރުވެރިން ރާއްޖެ އައިސްފައިވަނީ ޖުލައި މަހުގެ 30 ވަނަ ދުވަހުއެވެ. މިދުވަހު ރާއްޖެއަށް 218 ފަތުރުވެރިން ވަނީ ޒިޔާރަތްކޮށްފައެވެ. އަދި އެންމެ މަދުން ފަތުރުވެރިން ޒިޔާރަތްކުރީ ޖުލައިމަހުގެ 22 ވަނަ ދުވަހުއެވެ. އެއީ ޖުމްލަ 32 ފަތުރުވެރިންކަމަށް އިމިޤްރޭޝަންގެ ތަފާސް ހިސާބުން ދައްކައެވެ. ބޯޑަރު ހުޅުވާލި ދުވަސްކަމަށްވާ ޖުލައިމަހުގެ 15 ވަނަ ދުވަހު ރާއްޖެ ޒިޔާރަތްކުރީ 80 ފަތުރުވެރިންނެވެ.
ރާއްޖޭގެ ބޯޑަރު ހުޅުވާލުމާއިއެކު ރިސޯޓްތައްވެސް ވަނީ ފަތުރުވެރިންނަށް ޙިދުމަތްދޭން ހުޅުވާފައެވެ. ބޯޑަރު ހުޅުވާލިފަހުން ޖުލައިމަހުގެ ނިޔަލަށް ރާއްޖޭގެ 61 ރިސޯޓެއް އަލުން ހުޅުވާ ޙިދުމަތް ދޭން ވަނީ ފަށާފައެވެ. ބޯޑަރު އަލުން ހުޅުވާލި ދުވަހުވެސް 32 ރިސޯޓެއް ވަނީ ހުޅުވާފައިކަމަށް ޓޫރިޒަމް މިނިސްޓްރީގެ ތަފާސްހިސާބުތަކުން ދައްކައެވެ.