ޤައުމީ އެއަރލައިން، މޯލްޑިވިއަންއިން މިމަހުގެ 20 ވަނަ ދުވަހު ތައިލެންޑުގެ، ބެންކޮކަށް ހާއްސަ ދަތުރެއް ކުރުމަށް ނިންމައިފިއެވެ.
ތައިލެންޑުގެ، ބެންކޮކަށް ހާއްސަ ދަތުރެއް ކުރުމަށް މޯލްޑިވިއަންއިން ނިންމާފައިވާއިރު، އެއަރލައިނުން ވަނީ ބެންކޮކަށް ރާއްޖެއިން ދަތުރުކުރަން ބޭނުންވާ ފަރާތްތަކަށް މިހާރު ޓިކެޓު ވިއްކަން ފަށާފައެެވެ. އަދި ހަމަ އެދުވަހު ބެންކޮކުން ރާއްޖެއަށް އަންނަން ބޭނުންވާ ފަރާތްތަކަށްވެސް އެފުރުސަތު އޮންނާނެކަމަށް މޯލްޑިވިއަނުން ބުނެއެވެ.
މޯލްޑިވިއަންގައި ބެންކޮކަށް ދަތުރުކުރުމަށް ބޭނުންވާ ފަރާތްތަކުން މިމަހުގެ 15 ވަނަ ދުވަހުގެ ކުރިން ޓިކެޓު ގަންނަން ޖެހޭނެ ކަމަށް މޯލްޑިވިއަނުން ހާމަކުރެއެވެެ.
ކޯވިޑް-19 އާއި ގުޅިގެން ބެންކޮކުގެ ބޯޑަރުވަނީ ފަތުރުވެރިންނަށް ބަންދުކޮށްފައެވެެ. އެހެން ނަމަވެސް ތައިލޭންޑު ވިސާއަކާއެކު އެޤައުމަށް އެތެރެވެވެއެވެ. މޯލްޑިވިއަނުން ބުނީ މިދަތުރާއެކު ރާއްޖެއިން ސިއްޙީ ބޭނުންތަކުގައި ބެންކޮކަށްދާން ބޭނުންވެފައި ތިބި ފަރާތްތަކަށް އެ ފުރުސަތު ފަހިވެގެންދާނެކަމަށެވެ.
މޯލްޑިވިއަންއިން ދަނީ އެއަރލައިނުން ކުރިން ޝެޑިއުލް ދަތުރުތައް ކުރަމުން ދިޔަ މަންޒިލްތަކަށް ޝެޑިއުލް ދަތުރުތައް ފަށަމުންނެވެ. އެގޮތުން މިމަހުގެ 4 ވަނަ ދުވަހުން ފެށިގެން ބަންގްލަދޭޝްގެ ޑާކާއަށް މޯލްޑިވިއަންއިން ވަނީ ޝެޑިއުލް ދަތުރުތައް އަލުން ފަށާފައެވެ.
މިއީ ކޯވިޑް19 އަށްފަހު މޯލްޑިވިއަންގެ ބައިނަލްއަޤްވާމީ ދަތުރުތައް ހުއްޓާލާފައި އޮތުމަށްފަހު އެ ކުންފުނިން ދަތުރުތައް ފެށި ފުރަތަމަ ޤައުމެވެ.