މިދިޔަ އަހަރު ތެޔޮ ވިއްކައިގެން ލިބުނު އާމްދަނީ 2018 ވަނަ އަހަރާއި އަޅާ ބަލާއިރު 77 މިލިއަން ރުފިޔާ އިތުރުވެފައިވާކަމަށް ސްޓޭޓް ޓްރޭޑިންގ އޯގަނައިޒޭޝަން، އެސްޓީއޯއިން ހާމަކޮށްފިއެވެ.
އެސްޓީއޯއިން އާއްމުކޮށްފައިވާ މިދިޔަ އަހަރުގެ މާލީ ރިޕޯޓުގައިވާގޮތުން އެކުންފުންޏަށް އެންމެ ބޮޑު ފައިދާއެއް ލިބިފައިވަނީ ތެލުގެ ވިޔަފާރިންނެވެ. އެގޮތުން ތެޔޮ ވިއްކައިގެން އެސްޓީއޯއަށް 6.4 ބިލިއަން ރުފިޔާގެ އާމްދަނީއެއް ވަނީ ލިބިފައެވެ. މިއީ 2018 ވަނަ އަހަރު ލިބުނު 6.3 ބިލިއަން ރުފިޔާގެ އާމްދަނީއާއި އަޅާ ބަލާއިރު 77 މިލިއަން ރުފިޔާ އިތުރު އަދަދެކެވެ.
މިދިޔަ އަހަރުތެރޭ އެސްޓީއޯއިން ވަނީ ތެޔޮ ރައްކާ ކުރެވޭ މިންވަރު އިތުރުކުރުމަށްޓަކައި ކާމިޔާބު މަސައްކަތްތަކެއް ކުރިއަށްގެންގޮސްފައެވެ. އެގޮތުން އެސްޓީއޯގެ ތެޔޮ ރައްކާކުރާ ފުނަދޫގެ އެކްސްޕެންޝަން މަޝްރޫއު މިދިޔަ އަހަރު ވަނީ ނިންމާލާފައެވެ.
މި މަޝްރޫއާއެކު ފުނަދޫގައި ތެޔޮ ރައްކާކުރާ މިންވަރު ދެގުނައަށް ވަނީ އިތުރުވެގެން ގޮސްފައެވެ. އަދި މިހާރު އެއްވެސް ދަތިކަމެއް ނެތި ތެޔޮ ރައްކާކުރުމުގެ ޤާބިލްކަން އެ ކުންފުނީގައި އެބަހުރިކަމަށް އެސްޓީއޯއިން ބުނެއެވެ.
ފުނަދުއަކީ އެސްޓީއޯއިން ރާއްޖެ ގެންނަ ތެޔޮ ރައްކާ ކުރުމަށްޓަކައި، އެންމެ ބޮޑު ސްޓޯރޭޖް ހަދާފައިވާ ރަށަށްވާއިރު، އެ ރަށުގައި މީގެކުރިން ހުރީ ޖުމްލަ 24 ހާސް ޓަނުގެ ތެޔޮ ރައްކާ ކުރެވޭ އެކި ސައިޒުގެ 10 ޓޭންކެވެ.
ރާއްޖޭގައި ތެލުގެ ޔަޤީންކަން ކަށަވަރުކުރުމަށް ކުރަމުންގެންދާ މަސައްކަތްތަކުގެ ތެރެއިން އެސްޓީއޯއިން ވަނީ 2018 ވަނަ އަހަރުތެރޭ 25 ހާސް ޓަނުގެ ތެޔޮ އުފުލޭ ޓޭންކަރެއް ރާއްޖެ ގެނެސްފައެވެ. މި ތެޔޮ ޓޭންކަރާއެކު، އެސްޓީއޯއިން ރާއްޖެއަށް ތެޔޮ ގެނައުމުގައި ބޮޑެތި ފަސޭހަތަކެއް ލިބިފައިވާކަމަށް އެސްޓީއޯއިން ބުނެއެވެ.
ކޮލިޓީ ރަނގަޅު ތެޔޮ ރާއްޖޭގެ ބާޒާރުގައި ވިއްކުމަށް އެސްޓީއޯއިން ކުރަމުންދާ މަސައްކަތުގެ ދަށުން، މިދިޔަ އަހަރުގެތެރޭވަނީ ލޯ ސަލްފަރ ޑީސަލް ރާއްޖޭގެ ބާޒާރަށް ތައާރަފްކޮށްފައެެވެ. މިއާ އެކު އުޅަނދުތަކުގެ އިންޖީނުތަކުން ބޭރުވާ ދުމުގެ އަސަރު ކުޑަކުރެވިގެންދާނެކަމަށް އެސްޓީއޯއިން ބުނެއެވެ. ތެޔޮ އަޅަން ދިގު ކިއުތަކުގައި މަޑުކުރަން ޖެހުން ކުޑަ ކުރުމަށްޓަކައި އެސްޓީއޯއިން ވަނީ މިދިޔަ އަހަރުގެތެރޭ މާލޭގައި އިތުރު ޕެޓްރޯލް ޝެޑެއްވެސް ހުޅުވާފައެެވެ. މި ޝެޑު ހުޅުވާފައިވަނީ އިންޑަސްޓްރިއަލް ވިލެޖުގައެވެ.
ނިމިދިޔަ 2019 ވަނަ އަހަރަކީ އެސްޓީއޯގެ ތާރީޚުގައިވެސް މާލީގޮތުން އެންމެ ކާމިޔާބު އެއްއަހަރު ކަމަށް އެކުންފުނިން ވަނީ ހާމަކޮށްފައެވެ.
އެސްޓީއޯގެ މިދިޔަ އަހަރުގެ އަހަރީ ރިޕޯޓުގައިވާ ގޮތުގައި އެސްޓީއޯގެ ސާފު ފައިދާ ވަނީ އޭގެކުރީ އަހަރާ އަޅާބަލާއިރު ވަރަށް ބޮޑުތަނުން އިތުރުވެފައިވެއެވެ. އެގޮތުން 2018 ވަނަ އަހަރު 14 މިލިއަން ރުފިޔާ ސާފު ފައިދާގެ ގޮތުގައި ލިބުނުއިރު، 2019 ވަނަ އަހަރުގެ ސާފު ފައިދާއަކީ 303 މިލިއަން ރުފިޔާއެވެ.